ۇلىلاردى ۇلىقتاۋ – باستى پارىز
الماتى وبلىسىنداعى بالقاش اۋداننىڭ ورتالىعى – باقاناس اۋىلىندا مەملەكەت جانە قوعام قايراتكەرى دىنمۇحامەد قونايەۆتىڭ ەسكەرتكىشى بوي كوتەردى. كۇرتى گرانيتىنەن قاشالعان ەسكەرتكىش دەمەۋشىلەر ەسەبىنەن تۇرعىزىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
تاۋ تۇلعانىڭ ءور بەينەسىنىڭ بيىكتىگى - 3،30 مەتر بولسا، تۇعىرىنىڭ ۇزىندى - 2 مەتر، جالپى ەسكەرتكىشتىڭ تۇتاستاي العانداعى ەڭسەسى – 5،30 مەتر شاماسىندا. بۇل ايدىك ءمۇسىننىڭ اۆتورى التاي بەيسەنوۆ بولسا، ساۋلەتشىسى بەكزات بەيسەنوۆا ەكەن. باقاناس اۋىلىنا ەسكەرتكىشتىڭ اشىلۋىنا وراي جەرگىلىكتى بيلىك وكىلدەرى، دەپۋتاتتار، زيالى قاۋىم وكىلدەرى جانە اۋدان جۇرتشىلىعى جينالدى..
- حالقىمىزدىڭ ءبىرتۋار پەرزەنتى، مەملەكەت جانە قوعام قايراتكەرى دىنمۇحامەد احمەت ۇلى قونايەۆتىڭ تۋعانىنا بيىل 110 جىل. مەملەكەت باسشىسى قاسىم-جومارت كەمەل ۇلىنىڭ جارلىعىمەن قاپشاعاي قالاسىنا قونايەۆتىڭ ەسىمى بەرىلدى. بۇگىن، مىنە، قازاقتىڭ اياۋلى پەرزەنتىنە ۇلكەن قۇرمەت كورسەتىلىپ، ەڭسەلى ەسكەرتكىش ورناتىلدى. ءىرى تۇلعالاردىڭ ەرەن ەڭبەكتەرىن ۇلگى ەتىپ، ۇلىلاردى ۇلىقتاۋ – باستى پارىزىمىز. دىنمۇحامەد قونايەۆتىڭ بويىنداعى ۇلتجاندىلىق جاستارعا جۇعىستى بولسىن! قازاقتىڭ دارا تۇلعاسىنىڭ ەسكەرتكىشى قۇتتى بولسىن! – دەدى جيىندا ءسوز العان الماتى وبلىسىنىڭ اكىمى قانات بوزىمبايەۆ.
ءوز كەزەگىندە ەل ادىنا شىققان دىنمۇحامەد احمەت ۇلىنىڭ ۇرپاعى ەلدار اسقار ۇلى قونايەۆ بۇل كۇندى تاريحي كۇن دەپ باعالاپ، ديماش اقساقال ءۇشىن اتا-باباسىنىڭ تۋعان جەرى باقاناستىڭ، ونداعى جۇرتشىلىعىنىڭ ءجونى مەن جولى ءارقاشان ەرەكشە بولعانىن اتاپ ءوتىپ، حالىقتىڭ نيەتى مەن پەيىلىنە اۋلەتتەرى اتىنان ريزاشىلىق ءبىلدىردى. سونداي-اق، سالتاناتتى ءىس-شارادا ءسوز العان پارلامەنت سەناتىنىڭ دەپۋتاتى بەيبىت يسابايەۆ حالىق ىقىلاسى مەن كوڭىلىنەن شىققان تۇلعاعا دەگەن قۇرمەتتى ەشكىم دە، ەشقانداي كۇشپەن توقتاتا المايتىنىن ەرەكشە اتاپ ءوتتى. ال گەنەرال-لەيتەنانت امانگەلدى شابداربايەۆ «باقاناسقا ديماش احمەت ۇلىنىڭ ەسكەرتكىشىن قويۋ بالقاش حالقىنىڭ ارمانى ەدى، ۇزاق كۇتكەن ارمان بۇگىن ورىندالدى» دەدى.
ەسكەرتكىشتىڭ اشىلۋى سالتاناتىنان كەيىن دىنمۇحامەد قونايەۆ رۋحىنا قۇران باعىشتالىپ، اس بەرىلدى.