«قولا» ءۇشىن ءۇش قازاقستاندىق تالاسادى

ءۇش قازاقستاندىق دزيۋدوشى استانادا ءوتىپ جاتقان Qazagstan Barysy Grand Slam ءتۋرنيرىنىڭ قولا جۇلدەسى ءۇشىن كۇرەسەدى.

جارىستىڭ ەكىنشى كۇنى 73 كەلىگە دەيىنگى سالماقتا تاتاميگە شىققان قازاقستاندىق سپورتشىلار ءبىرشاما تابىستى ونەر كورسەتتى دەۋگە بولادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

اسقار نارقۇلوۆ جارتىلاي فينالدا تارتىستى جەكپە-جەكتە پولشا وكىلى ادام ستودولسكيگە ۆازاري ادىسىمەن ەسە جىبەردى.

ا. نارقۇلوۆ قولا جۇلدە ءۇشىن گرۋزيالىق دجوردجي تەراشۆيليمەن سىنعا تۇسەدى.

ازيا چەمپيونى دانيار شامشايەۆ جارتىلاي فينالدا «ۇلكەن دۋلىعا» ءتۋرنيرىنىڭ ەكى دۇركىن چەمپيونى ماحمادبەك ماحمادبەكوۆكە (INA) اۋىرتۋ ادىسىمەن ەسە جىبەردى.

وسى سالماقتا تاجىريبەلى سپورتشى، بۇعان دەيىن Grand Slam جارىستارىندا ەكى رەت كۇمىس، ءبىر قولا العان جانساي سماعۇلوۆ شيرەك فينالدا ا. ستودولسكيدەن ۇتىلدى. دەگەنمەن، جانساي جۇبانىش بەلدەسۋىندە كوسوۆولىق اكيل گياكوۆانى تازا جەڭدى.

قولا مەدالدى دانيار مەن جانساي ءوزارا ساراپقا سالادى، ياعني بىرەۋى جۇلدەگە ىلىگەدى.

فينالدىق بەلدەسۋلەر استانا ۋاقىتىمەن ساعات 17:00-دە باستالادى.