"قول سوزىم" جەردەگى جەڭىس جەتكىزبەدى

سلوۆەنيا - قازاقستان ويىنى 2-1 ەسىبىمەن اياقتالدى، دەپ حابارلايدى Almaty-akshamy.kz

سلوۆەنيانىڭ «ستوجيسە» ستاديونىندا 2024 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا قازاقستان مەن سلوۆەنيا قۇرامالارى كەزدەستى. بۇل ەكى قۇراما ءۇشىن دە توپتىق كەزەڭدەگى ەڭ سوڭعى، ءارى شەشۋشى ويىن ەدى. ەۋرو-2024 تۋرنيرىنە توپتان تىكەلەي شىعۋ ءۇشىن قازاقستانعا تەك جەڭىس قاجەت بولسا، ال سلوۆەنياعا تەڭ ناتيجە دە جەتكىلىكتى بولاتىن. سوندىقتان دا ەكى كوماندا جەڭىس ءۇشىن بارىن سالدى. ايتا كەتەر جايت، ەل قۇراماسىنىڭ بەلدى ويىنشىلارى باحتيەر زاينۋتدينوۆ، اسحات تاعىبەرگەن، باعدات قايىروۆتار جاراقاتتارىنا بايلانىستى ويىنعا قاتىسا المادى. كەزدەسۋدەگى ەسەپ 40-مينۋتتا قازاقستان قاقپاسىنا بەلگىلەنگەن پەنالتيدەن اشىلدى. ويىن تورەشىسى مارسينياك يان ۆوروگوۆسكيدىڭ ايىپ الاڭىندا ستويانوۆيچكە جاساعان ارەكەتىن VAR جۇيەسىنەن قايتالاپ كورىپ، ءتارتىپ بۇزۋ دەپ باعالادى. پەنالتي تەپكەن بەنيامين شەشكو ءمۇلت كەتپەدى. كوماندالار تايم ارالىق ۇزىلىسكە 1-0 ەسەبىمەن تارقاستى.

ەكىنشى تايم قازاقستان جانكۇيەرلەرى ءۇشىن قۋانىشپەن باستالدى. ۇزىلىستەن كەيىن جيناقى ويناي بىلگەن ەل قۇراماسى ماچتىڭ 48-مينۋتىندا ەسەپتى تەڭەستىردى. رامازان ورازوۆ سامورودوۆتىڭ پاسىنان كەيىن سلوۆەنيا قاقپاسىنا گول سوقتى. ودان ءارى ويىن قارقىنى قىزا ءتۇستى. ويىننىڭ 86-مينۋتىندا قارىمتا شابۋىلدى ءساتتى پايدالانىپ كەتكەن سلوۆەنيا قۇراماسى ەسەپتە العا شىقتى.  گول سوققان – بەنيامين ۆەربيچ. ويىن 2-1 ەسەبىمەن سلوۆەنيانىڭ جەڭىسىمەن اياقتالدى. بۇل جەڭىلىسكە قاراماستان قازاقستان قۇراماسىنىڭ ەۋروپا چەمپيوناتىنا ۇلتتار ليگاسى ارقىلى شىعۋعا مۇمكىندىگى بار.