سايىسقا 132 سپورتشى قاتىستى
اسكەري-قولدانبالى سپورت تۇرلەرىنەن قارۋلى كۇشتەردىڭ حح سپارتاكياداسى اياسىندا اقمولا وبلىسى ششۋچينسك قالاسىندا قورعانىس مينيسترلىگىنىڭ اسكەري كوللەدجىنىڭ بازاسىندا ارميالىق قويان-قولتىق ۇرىستان چەمپيونات ءوتتى، دەپ حابارلايدى Almaty-akshamy.kz.
وعان قارۋلى كۇشتەردىڭ بارلىق اسكەر تۇرلەرى مەن تەكتەرىنىڭ، وڭىرلىك قولباسشىلىقتارىنىڭ جانە باسقا دا كۇشتىك قۇرىلىمدارىنىڭ اتىنان 17 كوماندا قۇرامىندا 132 سپورتشى قاتىستى.
– ارميالىق قويان-قولتىق ۇرىسىنىڭ نەگىزگى ەلەمەنتتەرىن ءاربىر اسكەري قىزمەتشى ءبىلۋى ءتيىس. ويتكەنى، ناعىز جاۋىنگەر كەز كەلگەن وقيعادا جانە قالىپتاسقان جاعدايدا، قارۋمەن دە، قارۋسىز دا قارسىلاسقا قارسى تۇرا الۋى كەرەك. قازىرگى جارىستار سپورتشىلارىمىزدىڭ دايىندىق دەڭگەيىنىڭ جوعارى ەكەنىن كورسەتتى، – دەپ اتاپ ءوتتى قورعانىس مينيسترلىگىنىڭ اپپارات باسشىسى پولكوۆنيك ەربول قۇماربەك ۇلى.
جارىس قورىتىندىسى بويىنشا كوماندالىق ەسەپتە 32039 اسكەري ءبولىمىنىڭ قۇراماسى التىن جۇلدە ولجالاسا، كۇمىس – «شىعىس» وڭىرلىك قولباسشىلىعىنا، قولا – دەسانتتىق-شابۋىلداۋ اسكەرلەرىنە بۇيىردى.
جەكە بىرىنشىلىكتە 57 كەلىگە دەيىنگى سالماقتا 32039 اسكەري ءبولىمىنىڭ اسكەري قىزمەتشىسى مايور امان شاكىرتوۆ، 62 كەلىگە دەيىن – دەسانتتىق-شابۋىلداۋ اسكەرلەرىنىڭ جاۋىنگەرى كىشى سەرجانت ايدىن نۇريدينوۆ، 67 كەلىگە دەيىن – اۋە قورعانىسى كۇشتەرىنىڭ وفيسەرى اعا لەيتەنانت جانىبەك ءسابيت، 73 كەلىگە دەيىن – 32039 اسكەري ءبولىمىنىڭ نامىسىن قورعاعان مايور ۆاديم فەدوسەيەۆ، 80 كەلىگە دەيىن – 32039 اسكەري بولىمىنەن اعا لەيتەنانت باقتيار قوجاحمەتوۆ، 88 كەلىگە دەيىن – 32039 اسكەري ءبولىمىنىڭ ساردارى لەيتەنانت ارمان ەرمەنبەت، 97 كەلىگە دەيىن – قۇرلىق اسكەرلەرى اسكەري ينستيتۋتىنىڭ 4 كۋرس كۋرسانتى ەسبول دوسجان، 97 كەلىدەن جوعارى – قۇرلىق اسكەرلەرىنە تىكەلەي باعىنىستى ءبولىمنىڭ جاۋىنگەرى ەفرەيتور ەلامان قۋاتوۆ جەڭىس تۇعىرلارىنان كورىندى.