قازاقستان مۇسىلماندارى ءدىني باسقارماسى قوعامداعى قاتىگەزدىك جاعدايلارىنا بايلانىتى ۇندەۋ جاريالادى، دەپ حابارلايدى aqshamnews.kz.
"سوڭعى كەزدەرى قوعامدا بولىپ جاتقان ءتۇرلى قاتىگەزدىك وقيعالار ءبارىمىزدى قاتتى الاڭداتۋدا. وقۋشىلاردىڭ جاپپاي توبەلەسى، جاستار اراسىندا وزىنە قول جۇمساۋ وقيعالارىنىڭ ءجيى قايتالانۋى، تۇرمىستىق قاقتىعىستىڭ سوڭى ولىمگە ۇلاسۋى سىندى اۋىر جاعدايلار جانىمىزعا قاتتى باتۋدا.
شىن مانىندە اللاعا يمان ەتكەن پەندە ادام تۇگىل جانۋاردىڭ وزىنە زيان تيگىزبەۋى ءتيىس. ارداقتى پايعامبارىمىز (وعان اللانىڭ سالاۋاتى مەن سالەمى بولسىن): «ناعىز مۇسىلمان – وزگەلەرگە تىلىمەن دە، قولىمەن دە زيان تيگىزبەگەن ادام» دەگەن. حاديستەن ءتالىم العان مۇسىلمان ادامدارعا تىلىمەن دە، قولىمەن دە زيان تيگىزبەۋگە تىرىسادى.
شاريعاتىمىز بويىنشا بەيكۇنا ادامدى ءولتىرۋ – بارشا ادامدى ولتىرگەنمەن تەڭ. سونداي-اق بىرەۋدى ولىمنەن قۇتقارۋ – بارشا ادامدى ولىمنەن قۇتقارىپ قالۋمەن تەڭ. مۇنى جاستارىمىز جادىندا ۇستاپ، ومىرلىك قاعيداسىنا اينالدىرۋى قاجەت. اللا تاعالا قاسيەتتى كىتابىمىز قۇراندا بىلاي دەگەن: «...كىمدە كىم كىسى ولتىرمەگەن نەمەسە جەر بەتىندە بۇلىك شىعارىپ، بۇزاقىلىق جاساماعان بەيكۇنا جاندى ناقاقتان-ناقاق ولتىرسە، بۇكىل ادامزاتتى ولتىرگەندەي بولادى. سونداي-اق كىم بىرەۋدى ولىمنەن قۇتقارىپ قالسا، بۇكىل ادامزاتتى ولىمنەن قۇتقارعانداي بولادى...» («ءمايدا» سۇرەسى، 32-ايات).
قازاقستان مۇسىلماندارى ءدىني باسقارماسى ەلىمىزدەگى بارشا ازاماتتى ءوزارا باۋىرمال، كەشىرىمدى، مەيىرىمدى بولۋعا ۇندەي وتىرىپ، قاتىگەزدىك ىستەرگە جول بەرمەۋگە شاقىرادى. قمدب ۇجىمى قارالى ۇيلەردىڭ قايعىسىنا ورتاقتاسىپ، مارقۇمداردىڭ وتباسىنا، تۋعان-تۋىستارىنا تاعى دا كوڭىل ايتادى. اللا تاعالا مارقۇمداردى راقىمىنا بولەپ، ماڭگىلىك مەكەنىن ءجانناتتان ەتكەي. ءامين!
جاراتۋشى يەمىز حالقىمىزعا اماندىق، جەرىمىزگە تىنىشتىق، جاستارىمىزعا يمان بايلىعىن ءناسىپ ەتىپ، جاس بۋىن وكىلدەرىن قىلمىستىق ىستەردەن، كۇنالى ارەكەتتەردەن ساقتاعاي. ءامين!" -دەلىنگەن قمدب ۇندەۋىندە.