قازاقستان مۇسىلماندارى ءدىني باسقارماسى مارقۇمداردىڭ بەينەسىن Deep Nostalgia تەحنولوگياسى ارقىلى انيماسيالاۋعا قاتىستى پىكىر ءبىلدىردى، - دەپ حابارلايدى aqshamnews.kz ءتىلشىسى.
قمدب شەشىمى
ەگەر تەحنولوگيا الداۋدى، مارقۇمنىڭ ار-نامىسىن كەمسىتۋدى نەمەسە جاقىندارىنىڭ قايعىسىن ۇدەتۋدى قامتىسا، تىيىم سالىنادى. ەرەكشە جاعدايلاردا عانا قولدانۋعا رۇقسات ەتىلۋى مۇمكىن، ءبىراق بۇل ءۇشىن ءدىني، ەتيكالىق جانە پسيحولوگيالىق تالاپتاردى قاتاڭ ساقتاۋ قاجەت.
ءمۇفتياتتا يسلام عالىمدارى اراسىندا بۇل تەحنولوگياعا رۇقسات جونىندە ءارتۇرلى كوزقاراس بار ەكەنى ايتىلعان.
"كەيبىر عۇلامالار قارسى: مارقۇمنىڭ بەينەسىن "تىرىلتكەندەي" ەتۋ قۇرمەتسىزدىك بولىپ، شاريعاتقا قايشى دەپ قارايدى. دۋمك پايعامبارىمىزدىڭ (س.ع.س.) ءحاديسىن ەسكە سالعان: "ولگەندەردى جامانداماڭدار (قورلاماڭدار)، ويتكەنى ولار ءوز ىستەرىنىڭ ناتيجەسىن كوردى".
مارقۇمنىڭ جۇزىنە كۇلىمسىرەۋ، مۇڭايۋ سياقتى ەموسيالاردى "تاڭۋ" شاريعاتقا قايشى بال اشۋ/بولجاۋ ءتۇرى رەتىندە قابىلدانۋى مۇمكىن ەكەنى اتاپ وتىلەدى. سونىمەن قاتار، مارقۇمنىڭ كەلىسىمىنسىز بەينەسىن وزگەرتۋ جەكە ومىرگە قول سۇعۋ جانە ەتيكالىق نورمالاردى بۇزۋ دەپ سانالادى.
قاي كەزدە رۇقسات ەتىلەدى؟
قمدب Deep Nostalgia-نى قولدانۋ قاتاڭ شارتتارمەن عانا مۇمكىن دەيدى. اتاپ ايتقاندا:
- مارقۇمدى كەمسىتپەۋى، مازاقتاماۋى، ديسكريميناسيالاماۋى؛
- ادامدارعا زيان كەلتىرمەۋى؛
- مارقۇمنىڭ تۋىستارىنىڭ قايعىسىن كۇشەيتپەۋى؛
- مىندەتتى تۇردە وتباسىنان رۇقسات الۋ (مارقۇمنىڭ فوتوسى ونىڭ جەكە مەنشىگى رەتىندە قاراستىرىلادى).
سونداي-اق، مۇنداي انيماسيالانعان بەينەلەردى ناقتى ۆيدەو رەتىندە تاراتۋعا نەمەسە رەسمي قۇجاتتاردا قولدانۋعا بولمايدى، ويتكەنى بۇل - الداۋ.
پسيحولوگتاردىڭ ەسكەرتپەسى
قمدب پسيحولوگتاردىڭ پىكىرىنە دە سۇيەنگەن: "تەرەڭ نوستالگيا" از ۋاقىتقا عانا جۇباتۋى مۇمكىن، ءبىراق ەموسيالىق جانە پسيحولوگيالىق كۇيزەلىسكە ءتۇسىرۋى ىقتيمال. سالدارى رەتىندە دەپرەسسيا، ۇيقىنىڭ بۇزىلۋى، پسيحولوگيالىق تاۋەلدىلىك، الەۋمەتتىك وقشاۋلانۋ اتالادى.
انىقتاما
Deep Nostalgia AI – ەسكى فوتوسۋرەتتەردى انيماسيالاپ، بەت-الپەت قوزعالىسىن "جانداندىرىپ" كورسەتەتىن قۇرال.