كولىكتەگى پوليسيا دەپارتامەنتىنىڭ كريمينالدىق پوليسيا قىزمەتكەرلەرى باس كولىك پروكۋراتۋراسىنىڭ ۇيلەستىرۋىمەن جۇرگىزگەن اۋقىمدى ءارى جۇيەلى جۇمىسىنىڭ ناتيجەسىندە تەمىرجول قۇرامدارىنىڭ كونتەينەرلەرىنەن جۇك ۇرلاۋمەن اينالىسقان قىلمىستىق توپتىڭ ارەكەتى اشكەرەلەندى، - دەپ حابارلايدى aqshamnews.kz.
2025 جىلعى ءساۋىر ايىندا كولىك پوليسەيلەرى الماتى جانە شىعىس قازاقستان وبلىستارىنىڭ تۇرعىندارىنان قۇرالعان التى ادامنان تۇراتىن قىلمىستىق توپتى ۇستادى. تەرگەۋ بارىسىندا ولاردىڭ 2024 جىلعى تامىزدان 2025 جىلعى ساۋىرگە دەيىن "قحر-ەۋروپا" حالىقارالىق باعىتىمەن قاتىناعان پويىزداردىڭ كونتەينەرلەرىنەن جۇكتەردى جۇيەلى تۇردە ۇرلاپ كەلگەندەرى انىقتالدى. سوتقا دەيىنگى تەرگەپ-تەكسەرۋ بارىسىندا اتالعان توپتىڭ ءتورت ۇرلىق دەرەگىنە قاتىسى بار ەكەنى دالەلدەندى.
ۇرلانعان زاتتاردىڭ ىشىندە بەينەباقىلاۋ كامەرالارى، بالالار اربالارى جانە كولىك بولشەكتەرى بولعان. جۇك يەلەرىنە كەلتىرىلگەن جالپى شىعىن 212 ميلليون تەڭگەدەن استى. قىلمىستىق توپتىڭ بارلىق مۇشەلەرىنىڭ كىناسى تولىق دالەلدەنىپ، كەلتىرىلگەن ماتەريالدىق زالال تولىق كولەمدە وتەلدى. سوت شەشىمىمەن ولاردىڭ ءارقايسىسىنا 4 جىل مەرزىمگە باس بوستاندىعىن شەكتەۋ جازاسى تاعايىندالدى.
كولىكتەگى پوليسيا قىزمەتكەرلەرى جۇك تاسىمالىنىڭ قاۋىپسىزدىگىن قامتاماسىز ەتۋ جانە حالىقارالىق كولىك لوگيستيكاسى قاتىسۋشىلارىنىڭ مۇددەلەرىن قورعاۋ باعىتىنداعى جۇمىستى جالعاستىرادى.