پرەزيدەنتىمىز باسىم باعىتتىڭ ءبىرى قىلعان تۋريزم مەن الماتى تاۋ كلاستەرىن دامىتۋ بۇگىندە قالانىڭ تۇرعىندارى مەن قوناقتارىنىڭ اراسىندا تاۋدا دەمالۋ مادەنيەتىنىڭ قالىپتاسۋىنا تۇركى بولىپ وتىر.
تاۋ شاڭعىسى مەن سنوۋبوردقا دەگەن قىزىعۋشىلىقتىڭ ارتۋى، نۇسقاۋشىلاردىڭ ءرولى مەن ينفراقۇرىلىمنىڭ ماڭىزى تۋرالى Shymbulak كۋرورتىنداعى تاۋ شاڭعىسى مەن سنوۋبورد مەكتەبىنىڭ جەتەكشىسى نيكولاي حان الماتى قالاسىنىڭ وڭىرلىك كوممۋنيكاسيالار قىزمەتىنە بەرگەن سۇقباتىندا ايتىپ بەردى، - دەپ حابارلايدى aqshamnews.kz.
1995 جىلدان بەرى جۇمىس ىستەيتىن Shymbulak تاۋ شاڭعىسى مەكتەبى بارىنشا ءقاۋىپسىز قىزمەت قۇرۋعا باعىتتالعان ءبىرتۇتاس جۇيەنىڭ ءبىر بولىگى. نيكولاي حاننىڭ ايتۋىنشا، بىلتىردىڭ وزىندە مەكتەپتە شامامەن 30 مىڭ ساباق ءوتىپتى. قانشاما بالا مەن ەرەسەكتەر ءبىلىم العان وسى ۋاقىتتىڭ ىشىندە. تالاي ادام تاۋ شاڭعىسىمەن دە، سنوۋبوردپەن دە العاش وسىندا تانىسىپتى.
مەكتەپ جەتەكشىسىنىڭ ايتۋىنشا، الماتىنىڭ تاۋ كلاستەرىنىڭ دامۋى قىسقى دەمالىستى دا كىسى قىزىعاتىنداي ەتە تۇسۋگە سەپ بولادى. ينفراقۇرىلىم جاقسارىپ، سىرعاناۋ مەن وقۋعا ارنالعان جاڭا مۇمكىندىك پايدا بولىپ، سونىڭ ارقاسىندا بەلسەندى دەمالىستى تاڭدايتىن ادامداردىڭ سانى دا ارتىپ كەلەدى.
«تاۋ شاڭعىسى سپورتى ءقازىر جاتتىعۋ عانا ەمەس، ول ۇي-ىشىڭمەن كەلىپ دەمالاتىن ۇلكەن حوببيعا اينالدى»، — دەيدى نيكولاي حان دا تولىقتىرىپ.
ماۋسىمنىڭ قىزعان كەزەڭىندە مەكتەپ كۇن سايىن 300–500 ساباق وتەدى. مۇندا وقۋعا نيەت بىلدىرگەن كەز كەلگەن ادامدى قابىلداي بەرەدى. بالالار ءۇش جاستان باستاپ وقيدى، ەرەسەكتەردىڭ جاس شاماسىنا شەكتەۋ جوق ەكەن.
«مەنىڭ ەڭ جاسى ۇلكەن شاكىرتىم 87 جاستا بولدى، ەڭ كىشكەنتاي وقۋشىم — ءوزىمنىڭ قىزىم، وعان العاش رەت 11 ايلىعىندا شاڭعى تەبۋدى ۇيرەتتىم. دۇرىستاپ وقىتسا، مۇنى كەز كەلگەن ادام ۇيرەنىپ كەتەدى»، — دەيدى.
مەكتەپتە قاۋىپسىزدىك ماسەلەسىنە ەرەكشە كوڭىل بولىنەدى. ساباقتىڭ بارلىعىن نۇسقاۋشىلار ارنايى دايىندالعان وقۋ بەتكەيلەردە وتكىزەدى. دەنساۋلىعىندا كىناراتى بار ادامدار الدىن الا دارىگەرگە قارالىپ الۋى كەرەك ەكەن.
«قاۋىپسىزدىك ءبىرىنشى تۇرۋى كەرەك»، — دەيدى نيكولاي حان.
ونىڭ ايتۋىنشا، سىرعاناۋعا توسەلىپ، تراسسادا وپ-وڭاي ويقاستاپ ءجۇرۋ ءۇشىن 3–5 ساباق جەتكىلىكتى ەكەن. ءبىراق جوعارى دەڭگەيگە جەتۋ ءۇشىن ۇزبەي جاتتىعۋ كەرەك. تۋريستەردىڭ سانى كوبەيىپ جاتقاندىقتان سويتپەسكە امال جوق. سەبەبى وقىعان ادام وقىس وقيعاعا تاپ بولىپ، جاراقات الىپ قالۋدان امان جۇرەدى.
تاۋ كلاستەرىنىڭ دامۋى بىلىكتى نۇسقاۋشىلارعا دەگەن سۇرانىستى دا ارتتىرعان. ولاردىڭ سانى كوبەيگەنىمەن، سۇرانىس ىلەسە الماي جاتىر. سوندىقتان مامانداردى دايارلاۋ مەن بىلىكتىلىگىن ارتتىرۋعا كوپ كوڭىل ءبولىنىپ وتىر.
نيكولاي حان بالالارعا، وقۋشىلار مەن ستۋدەنتتەرگە ارنالعان باعدارلامالار ادامدى جاستايىنان تاۋعا جاقىن ەتىپ ءوسىرىپ، قىسقى سپورت تۇرىنە قىزىعاتىنداردىڭ سانىن ارتتىرۋعا مۇمكىندىك بەرەتىنىن ايتادى.
«ءبىزدىڭ مەكتەپتەگى ساباق باعاسى فورمات پەن وقۋشىنىڭ ساناتىنا بايلانىستى. مىسالى، بالالارعا ارنالعان جەكە ساباقتار 10 مىڭ تەڭگەدەن، ەرەسەكتەردىكى 15 مىڭ تەڭگەدەن باستالادى. توپتىق ساباق ارزانىراق. ءبىر ادامعا 8 مىڭ تەڭگەدەن. ادەتتە قۇرال-جابدىق ساباقتىڭ باعاسىنا كىرمەيدى، كۋرورتتاعى جالعا بەرۋ ورىندارىنان بولەك الىنادى. مەكتەپتە بالالار مەن جاسوسپىرىمدەردى تاۋ شاڭعىسى سپورتىنا تارتۋعا باعىتتالعان الەۋمەتتىك، مەكتەپتىك جانە توپتىق باعدارلامالار دا بار. بۇلاردىڭ فورماتى مەن شارتى ماۋسىمعا بايلانىستى وزگەرۋى مۇمكىن»، — دەپ ءتۇسىندىردى نيكولاي حان.
الداعى 5–10 جىلدا الماتىداعى تاۋ كلاستەرىنىڭ دامۋى Shymbulak-تى حالىقارالىق دەڭگەيدەگى كۋرورتقا اينالدىرىپ، قازاقستانداعى تاۋ شاڭعىسى سپورتىن بۇقارالىق سپورتقا اينالدىرۋى ءتيىس.
«دامىعان ينفراقۇرىلىم مەن كاسىبي نۇسقاۋشىلار — ءتۋريزمنىڭ تۇراقتى دامۋىنا نەگىز بولاتىن ۇلكەن فاكتور»، — دەپ تۇيىندەدى ءسوزىن نيكولاي حان.