قازاقستان فۋتبول فەدەراسياسى ۇلتتىق قۇرامانىڭ باس جاتتىقتىرۋشىسى ستانيسلاۆ چەرچەسوۆتىڭ باسپا ءسوز جيىنى كەزىندەگى ارەكەتىنە قاتىستى رەسمي مالىمدەمە جاسادى، دەپ حابارلايدى aqshamnews.kz.
الەۋمەتتىك جەلىلەردە جاريالانعان فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق تىلىنە قۇرمەت كورسەتپەۋىنە قاتىستى ۆيدەوعا بايلانىستى قازاقستان فۋتبول فەدەراسياسى جاعدايدى تۇسىندىرە ءوتۋ قاجەت دەپ سانايدى. جازبادا ۆيدەونىڭ ءۇزىندىسى كورسەتىلگەن. نەگىزى بۇل سۇراقتى فرانسيانىڭ پسج كلۋبىنىڭ فورماسىن كيىپ جۇرگەن قازاقستاندىق جۋرناليست بەگاسىل سەيىتقانوۆ باسپا ءسوز ءماسليحاتىندا قويعاننان كەيىن باس باپكەر ازىلدەپ، جاۋاپ قايتارعان بولاتىن. ستانيسلاۆ چەرچەسوۆ قازاق ءتىلى مەن ەلىمىزدىڭ مادەنيەتىنە ۇلكەن قۇرمەتپەن قارايدى، سونىمەن قاتار قازاق ءتىلىن بەلسەندى تۇردە وقىپ جاتقانىن مالىمدەيمىز، - دەپ جازدى فەدەراسيا حابارلامادا.
ايتا كەتەيىك، باسپا ءسوز جيىنى كەزىندە قازاق تىلىندە سۇراق قويعان تىلشىگە ستانيسلاۆ چەرچەسوۆ: "فرانسۋز تىلىندە سويلەپ تۇرسىڭ با؟ بۇل سۇراق پا، جوق، باسقا ما؟" – دەگەن ەدى. بۇل ءسوزى جانكۇيەرلەر مەن جەلى قولدانۋشىلارىن شامداندىرعان بولاتىن.