وتاندىق عىلىمنىڭ جەتىستىگىن دارىپتەۋ
وتاندىق QazVac ۆاكسيناسىنىڭ ءۇشىنشى كەزەڭ بويىنشا كلينيكالىق زەرتتەۋ جۇمىسى اياقتالدى. بۇل تۋرالى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ باس ديرەكتورى، كوروناۆيرۋسقا قارسى QazVac قازاقستاندىق ۆاكسينانىڭ اۆتورى كۇنسۇلۋ زاكاريا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىندە ءۇشىنشى كەزەڭ بويىنشا بارلىق كلينيكالىق زەرتتەۋ اياقتالىپ، 9 شىلدە كۇنى سوڭعى تالداۋ ناتيجەسى الىندى. شىلدەنىڭ سوڭىنا دەيىن تالداۋ ناتيجەسى تاعى ءبىر وڭدەلىپ، مالىمەتتەردىڭ ستاتيستيكاسى جاسالدى. بۇل جۇمىسقا 3 مىڭ ادام قاتىسىپ وتىر. سونداي-اق، شىلدەنىڭ سوڭىندا كلينيكالىق زەرتتەۋدىڭ قورىتىندى ەسەبى ازىرلەندى. قازىرگى كۇنى قورىتىندى ەسەپ دارىلىك زاتتار مەن مەديسينالىق بۇيىمداردى ساراپتاۋ ۇلتتىق ورتالىعىنىڭ ساراپتاۋىنان ءوتىپ جاتىر، ونىڭ ناتيجەسى ءالى كەلگەن جوق. دەگەنمەن ءبىزدىڭ ازىرلەگەن ەسەپكە قاراپ، العاش وتاندىق ۆاكسينانى كلينيكالىق زەرتتەۋ ءساتتى جۇرگىزىلدى دەپ ايتۋعا بولادى»، - دەدى كۇنسۇلۋ زاكاريا.
سونداي-اق، وتاندىق عالىم QazVac-تىڭ ءۇشىنشى كەزەڭىنە قاتىستى قورىتىندى ەسەپ وڭ باعا بەرىلگەن جاعدايدا وتاندىق ۆاكسينا تۋرالى عىلىمي ماقالالاردىڭ جارىق كورەتىنىن ايتتى. قازاقستاندىق ۆاكسينانىڭ اۆتورى كۇنسۇلۋ زاكاريانىڭ ايتۋىنشا، QazVac-تىڭ ءۇشىنشى كەزەڭى بويىنشا بارلىق كلينيكالىق زەرتتەۋ ەسەبىن دارىلىك زاتتار مەن مەديسينالىق بۇيىمداردى ساراپتاۋ ۇلتتىق ورتالىعى ماقۇلداعان جاعدايدا، قازاقستاندىق ۆاكسينا تۋرالى كوپكە تانىمال جۋرنالدارعا ماقالا جاريا ەتىلمەك. ونداعى ماقسات - وتاندىق عىلىمنىڭ جەتىستىگىن دارىپتەۋ.