ءال-فارابي اتىنداعى قازاق ۇلتتىق ۋنيۆەرسيتەتىندە 1-كۋرس بىلىمگەرلەرىن «ستۋدەنتتەر قاتارىنا قابىلداۋ» سالتاناتتى كەشى ءوتتى. كەشكە مەملەكەت جانە قوعام قايراتكەرلەرى، بەلگىلى عالىمدار، قالامگەرلەر، كاسىپكەرلەر، قارجىگەرلەر، جۋرناليستەر، بلوگەرلەر، ەسترادا جۇلدىزدارى ارنايى شاقىرىلدى.
سالتاناتتى شاراعا سونداي-اق شەتەل ديپلوماتيالىق وكىلدىكتەرى مەن كونسۋلدىق مەكەمە باسشىلارى، وقىتۋشى-پروفەسسورلار قاۋىمى مەن ءبىلىم الۋشى جاستار قاتىستى، دەپ حابارلايدى Almaty-akshamy.kz.
ءداستۇرلى مەرەكە ءانۇراندى ورىنداۋمەن باستالدى. 16 فاكۋلتەتتىڭ وكىلدەرى – ۋنيۆەرسيتەت تابالدىرىعىن جاڭا اتتاعان جاستار ارنايى شەرۋمەن ءجۇرىپ ءوتتى.
سالتاناتتى شارانى اشقان ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ بارشا قاتىسۋشىلاردى جاڭا وقۋ جىلىنىڭ باستالۋىمەن قۇتتىقتادى. رەكتور مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ بيىلعى وتىرىسىندا سويلەگەن سوزىندە: «ادىلەتتى قازاقستان» جانە «ادال ازامات» ۇعىمدارى ەل تىرەگى بولاتىن ەگىز قۇندىلىق رەتىندە ءاردايىم قاتار تۇرۋعا ءتيىس. ادال ازاماتقا ءتان قاسيەتتەر ءاربىر جاستىڭ بويىنان تابىلۋى كەرەك. ۇلتتىڭ جاڭا بولمىسى ءبىلىم، عىلىم جانە مادەنيەت سالاسىن دامىتۋ ارقىلى قالىپتاسادى»، – دەپ اتاپ وتكەنىنە ايرىقشا توقتالدى.
«بيىل ۇلتتىڭ جاڭا بولمىسىن قالىپتاستىرۋعا ۇمتىلعان 7436 تالاپكەر قازۇۋ-عا 1-كۋرسقا قابىلداندى. ونىڭ 4000-نان استامى مەملەكەتتىك گرانت يەلەرى. ءبىرىنشى كۋرس ستۋدەنتتەرىنىڭ اراسىندا 637 «التىن بەلگى» يەگەرلەرى مەن 267 ۇزدىك وقۋشى بار. ماگيستراتۋراعا – 1340، دوكتورانتۋراعا 278 ادام ءتۇستى»، – دەدى قازۇۋ رەكتورى. جوعارى وقۋ ورنىنا دەيىنگى ءبىلىم بەرۋ فاكۋلتەتىنە 1098 ادام قابىلداندى. قازۇۋ جاڭا وقۋ جىلىنا جالپى سانى 10 152 ادام قابىلدادى. قازىرگى تاڭدا قازۇۋ-دا 25 مىڭعا جۋىق ستۋدەنت بار، ونىڭ 2،5 مىڭعا جۋىعى الەمنىڭ 50 ەلىنەن كەلگەن شەتەلدىك ستۋدەنتتەر»، – دەي كەلە، رەكتور ۋنيۆەرسيتەت تاريحىنىڭ ماڭىزدى كەزەڭدەرى مەن قىزمەتىنىڭ ناتيجەلەرىن دە اتاپ ءوتتى.
بيىل ۋنيۆەرسيتەتتە 36 جاڭا ءبىلىم باعدارلاماسى ەنگىزىلدى. اتاپ ايتساق: «اقپاراتتىق جانە كوممۋنيكاسيالىق تەحنولوگيالار»، «ونەر جانە گۋمانيتارلىق عىلىمدار»، «دەنساۋلىق ساقتاۋ»، «جاراتىلىستانۋ، ماتەماتيكا جانە ستاتيستيكا»، «ماشينا جاساۋ، وڭدەۋ جانە قۇرىلىس سالالارى»، «پەداگوگيكالىق عىلىمدار».
بيىل جازدا اقتاۋ قالاسىندا وتكەن ۋنيۆەرسيادادا قازۇۋ سپورتشىلارى 39 التىن، 27 كۇمىس، 22 قولا مەدالعا قول جەتكىزىپ، كوش باستادى. قىتايدىڭ چەندۋ قالاسىندا وتكەن جازعى ۋنيۆەرسيادا جارىسىندا دا جاس سپورتشىلارىمىز جوعارى ناتيجەلەرگە قول جەتكىزدى.
كەلەسى جىلى ۋنيۆەرسيتەتىمىزدىڭ قۇرىلعانىنا 90 جىل تولادى. وتكەن جىلى ۇكىمەت قاۋلىسىمەن قازۇۋ-عا زەرتتەۋ ۋنيۆەرسيتەتى مارتەبەسى بەرىلدى. مەملەكەت باسشىسىنىڭ قولداۋىمەن ۋنيۆەرسيتەت ىستامبۇل جانە بىشكەك قالالارىندا ءوز فيليالدارىن اشتى. قازۇۋ-دا وتكەن جىلدان بەرى ميفي ۇلتتىق يادرولىق زەرتتەۋ ۋنيۆەرسيتەتىنىڭ فيليالى جۇمىس ىستەيدى. ءقازىر قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىن اشۋ جۇمىستارى ءجۇرىپ جاتىر. قالاشىق اۋماعىندا جاڭادان زاماناۋي ءدامحانالار، عالامتور-كافەلەر، دۇكەندەر، كوفەحانالار مەن كوشىرمە ورتالىقتارى جۇمىس ىستەيدى. بيىل 4000 ورىندىق جاتاقحانانىڭ قۇرىلىسى باستالادى.
ءسوز سوڭىندا رەكتور جانسەيىت تۇيمەبايەۆ سالتاناتتى جاعدايدا اقىل مەن پاراساتتى، اقيقات پەن ءبىلىمدى بەينەلەيتىن «ءبىلىم شىراعىن» جاقتى. بۇل ەرەكشە ءساتتى «دامۋ» ەتنو-دجاز اسپاپتىق توبى اسەرلى اۋەنمەن سۇيەمەلدەدى.
ءوز كەزەگىندە ءال-فارابي اتىنداعى قازۇۋ ديرەكتورلار كەڭەسىنىڭ ءتوراعاسى، ءال-فارابي اتىنداعى قازۇۋ تۇلەكتەر قاۋىمداستىعىنىڭ ءتوراعاسى قايرات ءمامي قۇتتىقتاۋ ءسوز سويلەپ، 1-كۋرس ستۋدەنتتەرىنە تابىس تىلەدى.
«ستۋدەنتتەر قاتارىنا قابىلداۋ» كەشى ەرەكشە ءوتىپ، شارا كونسەرتتىك باعدارلامامەن جالعاستى. كورەرمەندەر نازارىنا قىزىقتى ويىندار، پيكسەل جانە لازەرلىك شوۋ ۇسىنىلدى. ساحنادا تانىمال جاس ورىنداۋشى Malika Yes، «اقبۇلاق» فولكلورلىق ءانسامبلى، حالىقارالىق بايقاۋلاردىڭ جەڭىمپازى عالامات بەيسەقوجايەۆ، بەلگىلى ءانشى سەيفۋللين جولبارىس، مۇقاسان شاحزادايەۆ، Royals Live Band توبى جانە باسقا دا ەسترادا جۇلدىزدارى اننەن شاشۋ شاشتى.
مەرەكەدە قازۇۋ-دىڭ تالانتتى انشىلەرى مەن كرەاتيۆتى جاستارى دا ءوز ونەرلەرىن پاش ەتتى. زاڭ فاكۋلتەتىنىڭ ستۋدەنتتەرى «گۇل الماتى» شوۋىن دايىندادى. 30 شەتەلدىك ستۋدەنت جۇڭگو، كورەي، وزبەك، تۇرىكمەن، تۇرىك حالىق بيلەرىن بيلەپ، كوپشىلىك ىقىلاسىنا بولەندى. 140 ستۋدەنت «سالاۋاتتى ءومىر سالتى» جوباسىنىڭ جارقىن تۇساۋكەسەرىن ۇسىندى. ستۋدەنتتەردىڭ «ءبارىمىز بىرگە ەل ءۇشىن» قويىلىمىن «ادال ازامات» دەگەن جازۋمەن اياقتاعانى ەرەكشە اسەرگە بولەدى.
ستۋدەنتتەر مەرەكەسى فانتاستيكالىق لازەرلىك شوۋ مەن بي كەشىنە ۇلاستى.