ءال-فارابي اتىنداعى قازاق ۇلتتىق ۋنيۆەرسيتەتى سۋ تاسقىنى بولىپ جاتقان باتىس قازاقستان وبلىسىنا 5 ملن تەڭگەگە 20 توننا گۋمانيتارلىق كومەك جىبەردى.
سونداي-اق سۋ تاسقىنىنان ۇيلەرى زارداپ شەككەن 50 ستۋدەنتكە 100 مىڭ تەڭگەدەن جاردەماقى تاعايىندادى. جينالعان كومەكتىڭ جالپى سومماسى 10 ملن تەڭگەنى قۇرايدى، دەپ حابارلايدى Almaty-akshamy.kz جوو-نىڭ باسپا ءسوز قىزمەتىنە سىلتەمە جاساپ.
9 ءساۋىر كۇنى ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆتىڭ باستاماسىمەن وقۋ ورداسىنىڭ بازاسىندا ارنايى قايىرىمدىلىق پۋنكتى اشىلعان بولاتىن.
اكسياعا ۋنيۆەرسيتەتتىڭ وقىتۋشىلارى مەن قىزمەتكەرلەرى، ءبىلىم الۋشى جاستار بەلسەندى اتسالىستى.
گۋمانيتارلىق كومەك تىزىمىندە جاڭا كيىم-كەشەكتەر، ازىق-تۇلىك، جەكە گيگيەنا قۇرالدارى، كارەماتتار، بۇزىلمايتىن تاعامدار، اۋىزسۋ، توسەك-ورىن جابدىقتارى، رەزەڭكە ەتىكتەر مەن قولعاپتار جانە ت.ب. قاجەتتى زاتتار بار.
ونىڭ ىشىندە 250 قالىڭ توسەنىش، 500 كورپە، 300 جاستىق، 700 سۇلگى، 400 كىر سابىن، 500 ليتر سۇيىق سابىن بار. سونداي-اق 1300 كەلى ماكارون ونىمدەرى، 200 كەلى قاراقۇمىق، 500 كەلى كۇرىش، 200 كەلى قانت سياقتى ۇزاق ساقتالاتىن تاعام تۇرلەرى جونەلتىلدى.
ۇيلەرى سۋعا كەتكەن جانە قالپىنا كەلتىرۋگە جارامسىز ستۋدەنتتەردى قولداۋ قاراجاتى جەكە وزدەرىنە اۋدارىلادى.
