الماتىدا قازاق ۇلتتىق قىزدار پەداگوگيكالىق ۋنيۆەرسيتەتىنىڭ (قازۇپۋ) ستۋدەنتتەرى ءۇشىن زاماناۋي جاڭا جاتاقحانا پايدالانۋعا بەرىلدى. 120 ورىندىق بۇل نىسان جەكە ينۆەستيسيالار ەسەبىنەن سالىنعان. بۇل تۋرالى Aqshamnews.kz سايتى حابارلايدى.
جاڭا عيماراتتا تەك جاتىن بولمەلەر عانا ەمەس، دۋش بولمەلەرى، پراچەچنايا، وقۋ كابينەتتەرى، اسحانا سىندى ستۋدەنتتەرگە قاجەت بارلىق جاعدايلار قاراستىرىلعان. مۇنداي ينفراقۇرىلىم جاستاردىڭ وقۋىنا، دەمالۋىنا جانە دامۋىنا تولىق مۇمكىندىك بەرەدى.
ستۋدەنتتىك جاتاقحانالار قۇرىلىسىن ۇيلەستىرۋ جوبالىق كەڭسەسىنىڭ جەتەكشىسى دامير كۋتۋموۆتىڭ ايتۋىنشا، كەڭسە 2023 جىلدان بەرى جۇمىس ىستەپ كەلەدى. سول ۋاقىتتان بەرى الماتىدا 30 نىسان سالىنىپ، 8304 ستۋدەنتكە جاتاقحانا ورىندارى قامتاماسىز ەتىلگەن.
"بۇل جوبادا دا كاسىپكەر ارنايى مەملەكەتتىك باعدارلاما تۋرالى ەستىپ، بىزگە جۇگىندى. ءبىز قۇرىلىستىڭ بارلىق كەزەڭىندە قولداۋ كورسەتىپ، نىسان تولىق پايدالانۋعا بەرىلگەنگە دەيىن بىرگە جۇمىس ىستەدىك. جىل سوڭىنا دەيىن تاعى 5000 ورىنعا ارنالعان جاتاقحانالار تاپسىرىلماق"، – دەدى كۋتۋموۆ.
سونىمەن قاتار، الداعى ۋاقىتتا ءال-فارابي اتىنداعى قازۇۋ-عا ارنالعان 12 مىڭ ورىندىق جاتاقحانا سالۋ جوسپارلانىپ وتىر.
الماتى – ەلىمىزدەگى ەڭ ءىرى ءبىلىم بەرۋ ورتالىعى، مۇندا جۇزدەگەن مىڭ ستۋدەنت ءبىلىم الادى. سوندىقتان قالالىق اكىمدىك پەن جەكە ينۆەستورلار اراسىنداعى سەرىكتەستىك نەگىزىندە جاتاقحانا سالۋ – بولاشاق مامانداردى قولداۋدىڭ ماڭىزدى بولىگى.
قالا بيلىگىنىڭ پىكىرىنشە، مۇنداي جوبالار ءبىلىم ساپاسىن ارتتىرۋمەن قاتار، ستۋدەنتتەردىڭ ءومىر ءسۇرۋ دەڭگەيىن دە جاقسارتادى.