بۇل ادامدار ەكى ايعا قامالدى.
سىبايلاس جەمقورلىققا قارسى قىزمەت ق ر جۇك ۆاگونى پاركىنىڭ ءىرى وپەراتورى سانالاتىن «قازتەمىرترانس» اكسيونەرلىك قوعامىنىڭ لاۋازىمدى تۇلعالارىن پارا الدى دەگەن كۇدىكپەن ۇستادى، دەپ حابارلايدى Almaty-akshamy.kz Zakon.kz-كە سىلتەمە جاساپ.
اگەنتتىكتىڭ باسپا ءسوز قىزمەتىنىڭ مالىمدەۋىنشە، تۇراقتى تۇردە پارا الۋدىڭ بەلگىلەنگەن سحەماسىنا فيليالداردىڭ قىزمەتكەرلەرى مەن باسشىلارى، سونداي-اق باس كەڭسە بولىمشەلەرىنىڭ مەنەدجەرلەرى مەن باستىقتارى قاتىسقان.
«قوعامنىڭ جانە ونىڭ وڭىرلىك فيليالدارىنىڭ لاۋازىمدى تۇلعالارى جۇك ۆاگوندارىنىڭ تاپشىلىعىن پايدالانا وتىرىپ، كەيبىر جاعدايلاردا وسىنداي تاپشىلىقتى جاساندى تۇردە جاساي وتىرىپ، پروبلەمالاردى شەشۋدىڭ ورنىنا، وسى جاعدايدى وزدەرىنىڭ پايداكۇنەمدىك ماقساتىنا پايدالانىپ، ياعني جۇك ۆاگوندارىن كەدەرگىسىز جانە جەدەلدەتىپ بەرگەنى ءۇشىن كاسىپكەرلەردەن جۇيەلى نەگىزدە پارا العانى انىقتالدى»، - دەلىنگەن سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى تاراتقان اقپاراتتا.
اقشا قاراجاتتارى لاۋازىمدى تۇلعالاردىڭ نەمەسە ولاردىڭ سەنىمدى ادامدارىنىڭ، ونىڭ ىشىندە جاقىن تۋىستارىنىڭ كارت-شوتتارىنا اۋدارىلىپ وتىرعان.
ۆەدومستۆو وكىلدەرى تاراتقان اقپاراتقا سۇيەنسەك، اكسيونەرلىك قوعامنىڭ اقمولا فيليالىنىڭ ءبىر عانا باسشىسى 2020 جىلدان باستاپ 70 ميلليون تەڭگەدەن استام قاراجاتتى زاڭسىز الىپ، ونىڭ باسىم بولىگىن ششۋچە-بۋراباي كۋرورتتىق ايماعىنىڭ ويىن مەكەمەلەرىنە جۇمساعان.
قوعامنىڭ قاراعاندى فيليالىنىڭ بۇرىنعى جانە قازىرگى باسشىلارى دا وسىنداي قىلمىستار جاسادى دەگەن كۇدىككە ىلىنگەنى بەلگىلى بولدى.
«بۇل ادامداردىڭ بارلىعى ۇستالىپ، تەرگەۋ سوتىنىڭ سانكسياسىمەن 2 ايعا قاماۋعا الىندى. سونداي-اق اقشالاي قاراجاتتى زاڭسىز الۋدا قىزىلوردا فيليالىنىڭ باسشىسى مەن اكسيونەرلىك قوعامنىڭ ورتالىق اپپاراتىنىڭ ءبىرقاتار قىزمەتكەرى اشكەرەلەندى»، - دەپ مالىمدەدى سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى.
اگەنتتىك وسى قىلمىس بويىنشا باسقا لاۋازىمدى تۇلعالار تەكسەرىلىپ جاتقانىن حابارلادى. ق ر قپك-نىڭ 201-بابىنا سايكەس، تەرگەۋ مۇددەسىندە وزگە اقپارات جاريالاۋعا جاتپايدى.