سۋ رەسۋرستارى جانە يرريگاسيا مينيسترلىگىنىڭ «قازسۋشار» كاسىپورىنىندا 67 سۋشىلار اۋلەتى جۇمىس ىستەيدى.
ولاردىڭ باسىم بولىگى - 25 اۋلەت ق.ساتپايەۆ اتىنداعى كانالدا ەڭبەك ەتەدى. جامبىل وبلىستىق فيليالدا - 19، تۇركىستان وبلىستىق فيليالدا - 8، جەتىسۋ وبلىسىندا - 6، قىزىلوردادا - 3 جانە اقتوبە وبلىسىندا - 2 سۋشىلار اۋلەتى بار. باتىس قازاقستان، اقمولا، سولتۇستىك قازاقستان جانە شىعىس قازاقستان وبلىستارىندا سۋشىلاردىڭ 1 اۋلەتىنەن بار، دەپ حابارلايدى aqshamnews.kz سالا مينيسترلىگىنە سىلتەمە جاساپ.
ەڭ كوپ سۋشى شىققان اۋلەت - شامشييەۆتەر اۋلەتى. اقمولا وبلىستىق فيليالدا ءبىر وتباسىدان 7 مامان جۇمىس ىستەگەن. بۇگىندە اتالارى باستاعان قىزمەتتى نەمەرەلەرى جالعاستىرىپ كەلەدى.
كوكتەمگى سۋ تاسقىنى كەزىندە كوزگە ءتۇسىپ، مەملەكەت باسشىسىنان ماراپات العان شىڭعىستاۋ ابدييەۆ تە سۋشىلار اۋلەتىنىڭ نەگىزىن سالۋشى. بۇگىندە ونىڭ ءىنىسى مەن كەلىنى، بالاسى اقتوبە وبلىسى بويىنشا «قازسۋشار» فيليالىنىڭ ۋچاسكەلەرىندە جۇمىس ىستەيدى.
«ءبىز ەلىمىزدىڭ سۋ شارۋاشىلىعىندا قىزمەت ەتىپ جۇرگەن اۋلەتتەردى ماقتان تۇتامىز جانە ولاردىڭ ەڭبەگىن جوعارى باعالايمىز. بۇل وتباسىلار ءوز ىسىنە ادالدىعىمەن جاستارعا ۇلگى بولىپ، كاسىبي داعدىلارمەن قاتار، ەلىمىزدىڭ سۋ رەسۋرستارىنا دەگەن ۇلكەن جاۋاپكەرشىلىكتى جەتكىزۋدە. اكەدەن بالاعا، اتادان نەمەرەسىنە جالعاسىپ كەلە جاتقان ۇرپاقتار ساباقتاستىعى ءبىلىم مەن تاجىريبە الماسۋ ءۇشىن دە وتە ماڭىزدى بولىپ تابىلادى»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.