ق ر عىلىم جانە جوعارى ءبىلىم ۆيسە-مينيسترى تالعات ەشەنكۋلوۆ قحر فانچەنگان قالاسىنىڭ مەرى سيۋ مينحۋنمەن قازاقستان رەسپۋبليكاسى مەن جۇڭگو حالىق رەسپۋبليكاسى اراسىنداعى جوعارى ءبىلىم مەن عىلىم سالاسىنداعى ىنتىماقتاستىقتى دامىتۋ ماسەلەلەرى بويىنشا كەزدەستى.
بۇل كەزدەسۋ ءبىلىم بەرۋ سالاسىنداعى ەكى ەل اراسىنداعى ۇزاق مەرزىمدى ارىپتەستىكتى نىعايتۋعا باعىتتالعان، دەپ حابارلايدى aqshamnews.kz عىلىم جانە جوعارى ءبىلىم مينيسترلىگىنە سىلتەمە جاساپ.
كەزدەسۋ بارىسىندا قازاقستان تاراپى ەكىجاقتى ىنتىماقتاستىقتى دامىتۋ ءۇشىن العىشارتتاردى اتاپ ءوتتى. قازىرگى تاڭدا جۇڭگو ۋنيۆەرسيتەتتەرىمەن 241 كەلىسىم جاسالىپ، ءبىلىم بەرۋ جانە عىلىمي زەرتتەۋلەر سالاسىندا كوپتەگەن جوبالار جۇزەگە اسىرىلۋدا.
نەگىزىنەن جۇڭگو جانە قازاقستان اراسىندا ستۋدەنتتەرمەن الماسۋ باعدارلامالارىن كەڭەيتۋ، قوسىمشا عىلىمي-زەرتتەۋ جوبالارىن ىسكە اسىرۋ، وقىتۋشىلار مەن عىلىمي قىزمەتكەرلەردى الماستىرۋدى ۇيىمداستىرۋ، جاڭا بىرلەسكەن وقۋ باعدارلامالارىن ازىرلەۋ جانە ولاردى ىسكە قوسۋ، قازاقستاندا جۇڭگو ۋنيۆەرسيتەتتەرىنىڭ فيليالدارىن اشۋ مۇمكىندىكتەرىن قاراستىرۋ ماسەلەلەرى تالقىلاندى.
كەزدەسۋگە قاتىسۋشىلار ەكى ەل اراسىنداعى ىنتىماقتاستىقتى ودان ءارى نىعايتۋ جانە ءبىلىم مەن عىلىم سالاسىندا ورتاق جەتىستىكتەرگە قول جەتكىزۋ ءۇشىن بىرلەسكەن ءىس-شارالاردى جالعاستىرۋ قاجەتتىلىگىن اتاپ ءوتتى.
كەزدەسۋدىڭ قورىتىندىسى بويىنشا تاراپتار حالىقارالىق ءبىلىم بەرۋ مەن عىلىمي فورۋمداردى ۇيىمداستىرۋعا، سونداي-اق كادرلاردى دايارلاۋ جانە تاجىريبە الماسۋ ماسەلەلەرىن ىلگەرىلەتۋگە كەلىستى.