مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا مەكتەپتەر مەن جوعارى وقۋ ورىندارىندا سيفرلىق ساۋاتتىلىقتىڭ ءبىلىم باعدارلاماسىن ەنگىزۋدى تاپسىردى.
«قوعامدا زاڭ مەن ءتارتىپ يدەولوگياسىن تەرەڭ ورنىقتىرۋ قاجەت. سيفرلىق تەحنولوگيالاردىڭ كۇندەلىكتى ومىرىمىزگە جاپپاي ەنۋى ءتۇرلى الاياقتاردىڭ كوبەيۋىنە اكەپ سوقتىرۋدا. وعان ءبارىمىز كۋا بولىپ وتىرمىز. سوندىقتان ءقازىر قارجى جانە ەكونوميكا نەگىزدەرىن ءبىلۋ، قاراپايىم سيفرلىق داعدىلاردى مەڭگەرۋ اسا ماڭىزدى بولىپ تۇر. وسى رەتتە، «Amanat» پارتياسى ۇسىنعان «قارىزسىز قوعام» جوباسىن اتاپ وتكىم كەلەدى. ازاماتتاردىڭ قارجىلىق ساۋاتىن ارتتىرۋعا ارنالعان وسى جوباعا بىلتىر 65 مىڭ ادام قاتىستى. ال بيىل ودان دا كوپ ادام قاتىسادى.
مەكتەپتەردە، جوعارى وقۋ ورىندارىندا قارجىلىق جانە سيفرلىق ساۋاتتىلىق نەگىزدەرىن ۇيرەتەتىن ءبىلىم باعدارلاماسىن ەنگىزۋ قاجەت»، - دەدى مەملەكەت باسشىسى.
پرەزيدەنت بۇل جۇمىستى ۇكىمەت قارجى سالاسىن رەتتەۋ ورگاندارىمەن بىرگە اتقارۋى كەرەكتىگىن ايتتى.
«مۇنىڭ ءبارى ازاماتتارىمىزدىڭ ءارتۇرلى الاياقتاردىڭ قۇرىعىنا ءتۇسىپ قالماۋىنا مۇمكىندىك بەرەدى. قۇزىرلى ورگانداردىڭ ءبارى زاڭعا باعىناتىن جۇرتقا زاردابىن تيگىزىپ جاتقان الاياقتىققا جانە سول سياقتى باسقا دا زاڭسىز ارەكەتتەرگە قارسى باتىل شارالار قابىلداۋعا ءتيىس.
ءقازىر «قۇقىق بۇزۋشىلىقتاردىڭ الدىن الۋ تۋرالى» زاڭ جوباسى ازىرلەنىپ جاتىر. وسى زاڭنىڭ تالاپتارىن ورىنداۋ ءۇشىن قوعام مەن مەملەكەتتىك اپپارات كۇش جۇمىلدىرۋى كەرەك. سوندا عانا جاعدايدى تۇزەتىپ، زاڭ ۇستەمدىگىن جانە ازاماتتاردىڭ قاۋىپسىزدىگىن قامتاماسىز ەتە الامىز.
كەز كەلگەن قوعامنىڭ، سونىڭ ىشىندە ءبىزدىڭ قوعامنىڭ دا باستى ۇعىمدارعا نەگىزدەلگەن سۇرانىستارى – ادىلدىك جانە قاۋىپسىزدىك. وسى نەگىزگى سۇرانىستاردىڭ تولىعىمەن وتەلۋى مەملەكەتتىڭ ءتيىمدى جۇمىس ىستەيتىنىن ايقىن كورسەتەدى»، - دەدى پرەزيدەنت.