قازگيدرومەت رمك-سى قىركۇيەكتىڭ 4ء-ى كۇنگى كۇن رايى بولجامىن جاريالادى، دەپ حابارلايدى Almaty-akshamy.kz Inform.kz-كە سىلتەمە جاساپ.
كاسىپورىن تاراتقان دەرەكتەرگە قاراعاندا، قازاقستاننىڭ باسىم بولىگىنىڭ كۇن رايىنا بۇرىنعىشا قۇرعاق بولىپ كەلەتىن انتيسيكلون اسەر ەتەدى. تەك قازاقستاننىڭ باتىسى مەن سولتۇستىگىندە اتموسفەرالىق فرونتتاردىڭ وتۋىنە بايلانىستى وتكىنشى جاڭبىر جاۋىپ، كۇن كۇركىرەيدى. رەسپۋبليكانىڭ باتىس، سولتۇستىك، وڭتۇستىك بولىگىندە جەل كۇشەيىپ، وڭتۇستىك-باتىستا، وڭتۇستىكتە شاڭدى داۋىل تۇرادى.
جامبىل، قىزىلوردا، تۇركىستان، اقتوبە، الماتى، جەتىسۋ وبلىستارىنىڭ باسىم بولىگىندە، اتىراۋ وبلىسىنىڭ باتىسى مەن وڭتۇستىگىندە، شىعىسىندا، باتىس قازاقستان وبلىسىنىڭ وڭتۇستىگى مەن شىعىسىندا، اباي، قوستاناي وبلىستارىنىڭ وڭتۇستىگىندە، قاراعاندى، ۇلىتاۋ وبلىستارىنىڭ وڭتۇستىك-شىعىسىندا توتەنشە ءورت ءقاۋپى ساقتالادى. اقمولا، قوستاناي وبلىستارىنىڭ باسىم بولىگىندە جوعارى ءورت ءقاۋپى ساقتالادى.
كۇندىز الماتى، جامبىل، جەتىسۋ، قىزىلوردا، ماڭعىستاۋ، ۇلىتاۋ، اتىراۋ وبلىستارىنىڭ باسىم بولىگىندە، اقتوبە، قاراعاندى وبلىستارىنىڭ وڭتۇستىگىندە قاتتى ىستىق ساقتالادى.