ماجىلىستە قارالعان زاڭ جوباسىندا وسىنداي ماسەلە كوتەرىلدى.
قۇجاتتىڭ تولىق اتاۋى - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يتتەردىڭ ۇلتتىق تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى.
زاڭ جوباسى بويىنشا جاسالعان قورىتىندىنى دەپۋتاتتارعا پارلامەنت ءماجىلىسىنىڭ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ءامىرحان راحىمجانوۆ تانىستىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتۋىنشا، زاڭ جوباسى ماقۇلدانسا، قازاقى تازى مەن توبەت تۇقىمىن ساقتاۋ جانە ءوسىمىن مولايتۋعا جاۋاپتى ۋاكىلەتتى ورگان قۇرىلادى.
ول ۇيىمنىڭ قازىرگى شارتتى اتاۋى - قازاقى يت تۇقىمدارىنىڭ ۇلتتىق ورتالىعى.
«ورتالىقتىڭ نەگىزگى قۇزىرەتىنە ءبىرىڭعاي اسىل تۇقىمدى قازاقى تازى مەن توبەتتىڭ كىتابىن جۇرگىزۋ، اتالعان تۇقىمداردىڭ ستاندارتتارىن ازىرلەۋ جانە باسقا دا مىندەتتەر كىرەدى. سونىمەن قاتار، زاڭ جوباسى كينولوگيالىق قىزمەت ۇعىمدارىن، قازاقى تۇقىمدى ءيتتىڭ شىعۋ تەگى تۋرالى كۋالىكتى، ءبىرىڭعاي اسىل تۇقىمدى كىتاپتى، قازاق يت تۇقىمدارى مەن ۇلتتىق اڭشىلىق ستاندارتىن ايقىندايدى»، - دەدى دەپۋتات.
مەملەكەت بۇل ورتالىقتى وسى سالادا جۇمىس ىستەيتىن قوعامدىق بىرلەستىكتەرگە مەملەكەتتىك الەۋمەتتىك تاپسىرىس ارقىلى قارجىلاندىرىپ، قولداۋ كورسەتپەك.
«سونداي-اق، زاڭ جوباسىندا قازاقستان رەسپۋبليكاسىنىڭ عىلىمي ۇيىمدارى جۇزەگە اسىراتىن قازاق يت تۇقىمدارىن ساقتاۋ جانە ءوسىمىن مولايتۋ سالاسىنداعى عىلىمي زەرتتەۋلەر جونىندەگى نورما كوزدەلگەن. عىلىمي ۇيىمدار ۋاكىلەتتى ورگانمەن، ۇلتتىق ورتالىقپەن، سونداي-اق كينولوگيالىق قىزمەتتى جۇزەگە اسىراتىن قوعامدىق بىرلەستىكتەرمەن بىرلەسىپ، قازاقتىڭ يت تۇقىمدارىن ساقتاۋ جانە ءوسىمىن مولايتۋ سالاسىندا مەملەكەتتىك عىلىمي-تەحنيكالىق باعدارلامالار ازىرلەيدى. زاڭ جوباسىنىڭ نورمالارىن ىسكە اسىرۋ ءۇشىن 1،4 ملرد تەڭگە قاجەت بولادى. بۇل سوما 18 قازاندا رەسپۋبليكالىق بيۋدجەت كوميسسياسىنىڭ وتىرىسىندا قولداۋ تاپتى»، - دەدى ءامىرحان راحىمجانوۆ.
ەسكە سالساق، تامىز ايىندا قازاقى تازى مەن توبەتتى ساقتاۋ ماسەلەسىن پرەزيدەنتتىڭ ءىس باسقارماسى قولعا العانى حابارلانعان.