بۇگىن قازاقى يت تۇقىمدارىن ساقتاۋ جانە ءوسىمىن مولايتۋ جونىندەگى زاڭ كۇشىنە ەندى.
بۇل تۋرالى ەكولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى مالىمدەدى، دەپ حابارلايدى Almaty -akshamy. kz
2023 جىلعى 3 قاڭتاردا «قازاقى يت تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا ق ر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ قابىلدانعان بولاتىن. وندا قازاق يت تۇقىمدارىن ساقتاۋ جانە ءوسىمىن مولايتۋ سالاسىنداعى قىزمەتتى جۇزەگە اسىرۋدىڭ قۇقىقتىق، ۇيىمداستىرۋشىلىق جانە ەكونوميكالىق نەگىزدەرى بەلگىلەنگەن.
زاڭدا ۋاكىلەتتى ورگاننىڭ قۇزىرەتى بەلگىلەنگەن. ول – نورماتيۆتىك-قۇقىقتىق اكتىلەردى بەكىتۋ، ونىڭ ىشىندە قازاق يت تۇقىمدارىنىڭ ۇلتتىق ورتالىعىن قۇرۋ.
قازاقستاندا العاش رەت قۇرىلاتىن قازاقى يت تۇقىمدارىنىڭ ۇلتتىق ورتالىعى ورمان شارۋاشىلىعى جانە جانۋارلار دۇنيەسى كوميتەتىنىڭ «وحوتزووپروم» ءوب» رمقك-نىڭ قۇرىلىمدىق بولىمشەسى بولىپ تابىلادى.
ۇلتتىق ورتالىققا ستاندارتقا نەعۇرلىم ساي، ونىڭ ىشىندە سىرتقى-كونستيتۋسيالىق سيپاتتامالارى، وزگە دە قاسيەتتەرى سايكەس كەلەتىن تازى مەن توبەت ىرىكتەپ الىنادى، ولاردان كەيىننەن تازا تۇقىمدى يتتەر شىعارىلادى. اتالعان ورتالىقتىڭ جۇمىسىنا عالىمدار مەن بىلىكتى كينولوگتار شاقىرىلادى.
سونداي-اق ۇلتتىق ورتالىقتا قازاقى يت تۇقىمدارىن ساقتاۋ جانە ءوسىمىن مولايتۋ سالاسىندا مەملەكەتتىك عىلىمي-تەحنيكالىق باعدارلامالار ازىرلەنەدى. ساراپشىلار مەن كينولوگ مامانداردى وقىتۋ جۇمىستارى جۇرگىزىلەدى. ازىرلەنگەن ستاندارتتارعا سايكەس تازى مەن توبەتتىڭ ءبىرىڭعاي كىتابى جۇرگىزىلىپ، ولاردىڭ شىعۋ تەگى تۋرالى كۋالىك بەرىلەدى.
كوميتەتتىڭ باستاماسىمەن جۇمىس توبى قۇرىلدى. وعان ۋاكىلەتتى ورگاننىڭ، عىلىمي جانە قوعامدىق ۇيىمداردىڭ وكىلدەرى، كينولوگتار، قازاقى يت تۇقىمدارىن وسىرۋشىلەر كىردى. قازىرگى تاڭدا جۇمىس توبى ۇلتتىق ورتالىقتىڭ قىزمەتكەرلەر قۇرىلىمىن، شتاتتىق كەستە جانە بىلىكتىلىك تالاپتارىن ازىرلەدى.
سونداي-اق پرەزيدەنتىمىز تازى مەن توبەتتى قازاقى يت تۇقىمدارى رەتىندە الەمگە تانىتۋ مىندەتىن قويدى.
وسىعان وراي، 2023 جىلدىڭ مامىر ايىندا بەلگيانىڭ تيۋەن قالاسىندا قازاقستان كينولوگتار وداعىنىڭ پرەزيدەنتى مەن حالىقارالىق كينولوگيالىق فەدەراسيانىڭ (FCI) باسشىسىمەن كەلىسسوز جۇرگىزدى.
كەزدەسۋ اياسىندا قكو-نىڭ FCI-گە تولىق قۇقىلى مۇشەلىگىنە رەسمي ءوتىنىم بەرىلدى. بۇل ماسەلە حالىقارالىق كينولوگيالىق فەدەراسيانىڭ باس اسسامبلەياسىندا 2023 جىلعى 21-22 تامىزدا جەنيەۆادا (شۆەيساريا) قارالاتىن بولادى