قازاقتىڭ كيىز ءۇيى حالىقارالىق كورمەنىڭ بەينەسىنە اينالدى

اتالمىش كورمەگە الەمنىڭ 50-دەن استام ەلىنىڭ تۋريستىك وكىلدەرى جينالدى.

قازاقستان ەلشىلىگى ءيزرايلدىڭ ەكونوميكالىق جانە مادەني ءومىرىنىڭ كۇنتىزبەسىندەگى ماڭىزدى وقيعالاردىڭ ءبىرى – 28ء-شى تۋريزم بويىنشا حالىقارالىق جەرورتا تەڭىزى كورمەسىندە (IMTM 2022) كيىز ءۇي ەكسپوزيسياسىن اشتى، دەپ حابارلايدى Almaty-akshamy.kz ق ر ءسىم باسپا ءسوز قىزمەتىنە سىلتەمە جاساپ.

كوروناۆيرۋس پاندەمياسى باستالعاننان بەرى العاش رەت وففلاين فورماتتا وتكەن كورمەگە بىرنەشە مىڭ قوناقتار، سونداي-اق الەمنىڭ 50-دەن استام ەلىنىڭ تۋريستىك وكىلدەرى جينالدى. تۋريستىك جارمەڭكەنى يزرايل پرەزيدەنتى يسحاك گەرسوگ اشتى.

قازاق كيىز ءۇيى ءىس-شارا قوناقتارىنىڭ ەرەكشە ءىلتيپاتىنا بولەندى، ال ءيزرايلدىڭ تۋريزم ءمينيسترى يوەل رازۆوزوۆ ەكسپوزيسيانى العاشقىلاردىڭ ءبىرى بولىپ تاماشالادى.

كورمەگە كەلۋشىلەر قازاق حالقىنىڭ سالت-داستۇرلەرىمەن تانىسىپ، كيىز ءۇي ەلەمەنتتەرىنىڭ قاسيەتتى ماعىناسى تۋرالى ءبىلىپ، قازاق تاعامدارىنىڭ ءدامىن تاتىپ، ۇلتتىق كيىمدەردى كيىپ كورىپ، قازىرگى قازاقستاننىڭ تابيعاتى، ساۋلەتى مەن تۇرعىندارى بەينەلەنگەن فوتوسۋرەتتەردى تاماشالاپ، دومبىرانىڭ اۋەنىنە قۇلاق ءتۇردى.

IMTM شىعىس جەرورتا تەڭىزى ايماعىنداعى تۋريزم سالاسىنداعى ەڭ ءىرى كورمە بولىپ تابىلادى جانە ءيزرايلدىڭ تۋريزم مينيسترلىگى، قوناق ۇيلەر قاۋىمداستىعى، تۋريستىك اگەنتتىكتەر قاۋىمداستىعى جانە يزرايل تۋروپەراتورلار قاۋىمداستىعىنىڭ كەڭ قولداۋىمەن وتەدى.