فورۋم جۇمىسىنا تۇڭعىش رەت قازاقستاننىڭ ەقىۇ، بۇۇدب، يۋنيسەف، فريدريح ەبەرت قورى، يۋنەسكو، يۋسايد سياقتى حالىقارالىق سەرىكتەستەرى قاتىسۋدا.
X ازاماتتىق فورۋمنىڭ جۇمىسى 22-26 قاراشا ارالىعىندا نۇر-سۇلتان جانە الماتى قالالارىندا 5 كۇن بويى ونلاين جانە وفلاين فورماتتا دا وتەدى، دەپ حابارلايدى Almaty-akshamy.kz
ۇكىمەتتىك ەمەس سەكتورمەن ءوزارا ءىس-قيمىل سالاسىندا قازاقستان تاۋەلسىزدىگىنىڭ 30 جىلدىعىنىڭ ەڭ ءىرى وقيعاسى: «قوعام مەن مەملەكەتتىڭ تۇراقتى دامۋى مۇددەسىندەگى ارىپتەستىكتىڭ 30 جىلى» تاقىرىبىمەن قازاقستاننىڭ X ازاماتتىق فورۋمى باستالدى.
فورۋمدى اقپارات جانە قوعامدىق دامۋ ءمينيسترى ايدا بالايەۆا مەن قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازييەۆا اشتى.
مينيستر ءوز سوزىندە X ازاماتتىق فورۋمنىڭ جۇمىسى قازاقستان تاۋەلسىزدىگىنىڭ 30 جىلدىعىنىڭ قورىتىندىلارىنا ارنالعان ماڭىزدى وقيعا ەكەنىن اتاپ ءوتتى.
تاۋەلسىزدىك تاڭىندا قازاقستاننىڭ ازاماتتىق سەكتورى ونداعان ۇەۇ-دان باستالعانىن ەسكە سالعان ايدا بالايەۆا، بۇگىندە ەلىمىزدىڭ بۇل سالاسى ورتالىق ازياداعى ەڭ دامىعان قوعامدىق ينستيتۋتقا اينالعانىن ايتتى. ماسەلەن، جىل سايىن قازاقستاندىق «ءۇشىنشى سەكتوردىڭ» قاتارى ورتا ەسەپپەن 150 جاڭا قاتىسۋشىعا ارتىپ كەلەدى.
«ازاماتتىق فورۋم – بۇل كەيبىرەۋلەر دايەكسىز ايتاتىنداي «ۇەۇ وكىلدەرىنىڭ دەكلاراتيۆتى-حاتتامالىق جيىنى» ەمەس، قولدانبالى يدەيالار مەن باستامالار تۋىندايتىن، مينيسترلەر مەن اكىمدەر ازاماتتىق بەلسەندىلەرمەن تەڭ دارەجەدە بىرلەسكەن ءىس-قيمىل جوسپارلارىن جاسايتىن، جەكەلەگەن الەۋمەتتىك پروبلەمالاردى شەشۋگە مەملەكەت ۇەۇ-لاردى تارتاتىن ناقتى جۇمىس پروسەسى»، - دەدى مينيستر.