قازاقستاننىڭ ۇزاق مەرزىمدى تۇراقتىلىعى – اەس تۋرالى ساراپشى پىكىرى

Satbayev Universityء-دىڭ قاۋىمداستىرىلعان پروفەسسورى ينەش كەنجينا اتوم ەلەكتر ستانسياسىنىڭ قۇرىلىسى قازاقستانعا كوپتەگەن سالالاردا ۇزاق مەرزىمدى تۇراقتىلىققا قول جەتكىزۋگە مۇمكىندىك بەرەتىنىن ايتتى، دەپ حابارلايدى aqshamnews.kz

ساراپشىنىڭ ايتۋىنشا، باستاپقى كەزەڭدە اەس قۇرىلىسىنا ەلەۋلى ينۆەستيسيالار قاجەت بولعانىمەن، ونىڭ جۇمىس شىعىندارى كومىر نەمەسە تابيعي گازبەن جۇمىس ىستەيتىن جىلۋ ەلەكتر ستانسيالارىنا قاراعاندا الدەقايدا تومەن. بۇل، اسىرەسە، وتىن اۋىستىرۋ كەزەڭىنىڭ ۇزاقتىعى (1،5 – 2 جىل) جانە اەس-تىڭ وتىن قۇنىنىڭ ەلەكتر ەنەرگياسىن ءوندىرۋدىڭ وزىندىك قۇنىنداعى ۇلەسىنىڭ شامامەن 10%-دى قۇرايتىندىعىمەن بايلانىستى. بۇل فاكتورلار تۇتىنۋشىلار ءۇشىن ەنەرگيا باعاسىنىڭ تۇراقتىلىعىن قامتاماسىز ەتەدى.

– ۇزاق مەرزىمدى پەرسپەكتيۆادا اتوم ەنەرگەتيكاسى ەكونوميكالىق تۇرعىدان ءتيىمدى بولا تۇسەدى، ويتكەنى اەس-تىڭ قىزمەت ەتۋ مەرزىمى قازىرگى تاڭدا 60 جىلدى قۇراپ، بولاشاقتا ونى 80 جانە ودان دا كوپ جىلعا دەيىن ۇزارتۋ مۇمكىندىگى بار. سونىمەن قاتار، اەس قازاقستاننىڭ ەنەرگەتيكالىق جۇيەسىن الەمدىك ەنەرگەتيكالىق نارىقتاعى وزگەرىستەرگە ءتوزىمدى ەتەدى، كومىرسۋتەكتەرگە تاۋەلدىلىكتى ازايتىپ، مۇناي مەن گازدىڭ الەمدىك باعاسىنداعى اۋىتقۋلاردان ەلدىڭ ەكونوميكاسىن قورعايدى. بۇل قازاقستانعا ەكونوميكانىڭ تۇراقتىلىعىن ارتتىرىپ، شىعىنداردى الدىن الا بولجاپ وتىرۋعا مۇمكىندىك بەرەدى، – دەپ اتاپ ءوتتى ينەش كەنجينا.

ونىڭ پىكىرىنشە، اەس سونىمەن قاتار ەلدىڭ ەكولوگيالىق جاعدايىن جاقسارتۋعا، كومىرتەگى شىعارىندىلارىن ازايتۋعا ىقپال ەتىپ، جاھاندىق ەنەرگەتيكالىق نارىقتاعى بولاشاق قيىندىقتارعا دايىندالۋعا كومەكتەسەدى. اتوم ەنەرگەتيكاسى قازاقستانعا ەنەرگەتيكالىق قاۋىپسىزدىكتى نىعايتۋعا جانە ەكونوميكانى سىرتقى اسەرلەردەن قورعاۋعا مۇمكىندىك بەرەدى.