قازاقستاننىڭ ۇلىبريتانياداعى ەلشىسى ەرلان ىدىرىسوۆ - «ەركىن ادام» اتاعىنا يە بولعان العاشقى وتانداسىمىز.
Freeman، ياعني «ەركىن ادام» اتاعى بىرىككەن كورولدىك پەن باسقا ەلدەر اراسىنداعى ىسكەرلىك قاتىناستاردى جاقسارتۋعا ۇلەس قوسقان بريتانيالىقتار مەن شەتەلدىكتەرگە بەرىلەدى. كەزىندە مۇنداي قوشەمەتكە پاتشالار مەن پرەمەر-مينيسترلەر جانە باسقا دا اتى اڭىزعا اينالعان تۇلعالار يە بولعان، دەپ حابارلايدى Almaty-akshamy.kz Khabar.kz-كە سىلتەمە جاساپ.
لوندوندىق ءسيتيدىڭ قۇرمەتتى ازاماتى – «فريمەن» اتاعىن سالتاناتتى تۇردە تابىستاۋ ءراسىمى 1232 جىلدان بەرى چەمبەرلەن سارايىندا وتكىزىلىپ كەلەدى. ءدال وسى جەردە پاتشايىم ەليزاۆەتا ەكىنشى، پرەمەر-مينيسترلەر ۋينستون چەرچيل، مارگارەت تەچەر جانە باسقا دا كورنەكتى تۇلعالار تاريحي قۇجاتقا يە بولعان.
ورتا عاسىرلاردا بۇل اتاقتىڭ يەسى لوندون كوپىرىنىڭ ۇستىمەن قويلارىن ەركىن وتكىزۋ قۇقىعىنا يەمدەنگەن. باج سالىعىنان بوساتىلعان فريمەن سميتفيلد بازارىنا بارىپ، مالىن ساۋدالاي العان.
ءقازىر البەتتە بۇل اتاقتىڭ تەك سيمۆوليكالىق قۇندىلىعى بار. ءبىراق بىرىككەن كورولدىك پەن باسقا ەلدەر اراسىنداعى ىسكەرلىك قاتىناستاردى نىعايتۋعا زور ۇلەس قوسقان بريتانيالىقتار مەن شەتەلدىكتەرگە عانا بەرىلەدى. قازاقستاننىڭ ۇلىبريتانياداعى ەلشىسى ەرلان ىدىرىسوۆ – وسىنداي قۇرمەتكە يە بولعان العاشقى وتانداسىمىز. وعان «بوستاندىق كوشىرمەسى» اتتى پەرگامەنت قۇجاتى تابىستالدى. ماراپاتتىڭ اۆتورى – XVIII عاسىردىڭ ورتاسىندا لوندوندىق ءسيتيدىڭ لورد-مەرى بولعان دجون بارنارد. ىشىندە «ەركىن ادام - فريمەننىڭ» ءومىر ءسۇرۋ سالتىن سۋرەتتەيتىن نۇسقاۋلىق بار.
«قۇرمەتتى ازامات اتاعى – لوندوندىق ءسيتيدىڭ ەڭ جوعارعى ماراپاتى. سالتاناتتى ءراسىمنىڭ قازاقستان مەن ۇلىبريتانيا اراسىنداعى ديپلوماتيالىق قارىم-قاتىناستىڭ 30 جىلدىعى قارساڭىندا ءوتىپ جاتقانىن اتاپ وتكەن ءجون. وسى ۋاقىت ارالىعىندا ەكى ەل ءتۇرلى سالالار بويىنشا مىقتى ستراتەگيالىق ارىپتەستىك ورناتا ءبىلدى»، - دەيدى بريتان-قازاق قوعامىنىڭ وپەراسيالىق ديرەكتورى دجەففري تەمپل.
بۇل اتاق – بىرىككەن كورولدىكتىڭ قازاقستانمەن ارىپتەستىگىن تەرەڭدەتۋگە مۇددەلى ەكەندىگىنىڭ ايعاعى. سونىمەن قاتار مەملەكەتىمىزدىڭ الەمدىك قارجى ورتالىعى – لوندوندىق سيتيمەن ارىپتەستىك بايلانىسى نىعايا تۇسكەندىگىنىڭ دالەلى. قازاقستان ءالى دە بريتانيالىق ينۆەستورلار مەن بيزنەسكە قولايلى جاعداي جاساپ، وتاندىق كومپانيالارىمىزدىڭ سيتيدەگى جۇمىس اۋقىمىن كەڭەيتۋگە ىقپال ەتە بەرمەك.