قازاقستاننىڭ قىتايداعى ەلشىلىگى ارنايى ءموبيلدى قوسىمشاسىن ىسكە قوستى

اقپاراتتىق تەحنولوگيالاردى ەنگىزۋ ارقىلى ق ر ازاماتتارى ءۇشىن اقپارات پەن قىزمەتتەردىڭ قولجەتىمدىلىك دەڭگەيىن ارتتىرۋ ماقساتىندا، قازاقستاننىڭ قىتايداعى ەلشىلىگى «Kaz Consul» ارنايى ءموبيلدى قوسىمشاسىن ىسكە قوستى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ەلىمىزدىڭ قىتايداعى ەلشىلىگى ءمالىم ەتكەندەي، بۇگىن وسى ءموبيلدى قوسىمشانىڭ ونلاين-تانىستىرىلىمى ءوتىپ، قاتىسۋشىلار ينتەرفەيستىڭ ىڭعايلىعى مەن قازاق جانە ورىس تىلدەرىندە جاريالانعان اقپاراتتىڭ وزەكتىلىگىن جوعارى باعالادى. ەندى قازاقستاندىقتار قىتايدىڭ كەز كەلگەن ايماعىندا بولا وتىرىپ، WeChat ءموبيلدى پلاتفورماسىنداعى «Kaz Consul» پاراقشاسىنا كىرۋ ارقىلى نەكە قيۋ، تۋۋ تۋرالى كۋالىك، ۇلتتىق پاسپورت، ەسق كىلت الۋ، سونداي-اق نوتارياتتىق ىس-ارەكەتتەر جاساۋ سەكىلدى مەملەكەتتىك قىزمەتتەر بويىنشا ءتيىستى اقپاراتتى الادى. سونىمەن قاتار، ءموبيلدى قوسىمشادا كونسۋلدىق وكرۋگتەردىڭ كارتاسى ۇسىنىلعان جانە كونسۋلدىق ەسەپكە ونلاين تۇرۋ مۇمكىندىگى قاراستىرىلعان. بۇدان باسقا، «Kaz Consul» ءموبيلدى قوسىمشاسىندا كورسەتىلگەن تەلەفوندار ارقىلى ءبىزدىڭ ازاماتتار قحر اۋماعىنداعى قازاقستاننىڭ كونسۋلدىق مەكەمەلەرىنىڭ كەز كەلگەن قىزمەتكەرىمەن تىكەلەي بايلانىسا الادى.