مادەنيەت جانە اقپارات مينيسترلىگى 2024 جىل قورىتىندىلارىن شىعارۋدا. بۇگىن مينيسترلىك وتباسى جانە گەندەرلىك ساياسات سالاسىنداعى قىزمەت ناتيجەلەرىن ۇسىندى.
2024 جىلدىڭ ەڭ ماڭىزدى وقيعالارىنىڭ ءبىرى – «وتباسىلىق-تۇرمىستىق زورلىق-زومبىلىق تۋرالى» زاڭنىڭ قابىلدانۋى. جاڭا رەداكسيا ايەلدەر مەن بالالارعا قاتىستى زورلىق-زومبىلىققا جازانى قاتاڭداتىپ، وتباسىلىق-تۇرمىستىق سالاداعى قۇقىق بۇزۋشىلىقتاردى كريميناليزاسيالادى، دەپ حابارلايدى aqshamnews.kz مينيسترلىككە سىلتەمە جاساپ.
مينيسترلىك ءىىم، ەحاقم، دسم جانە باسقا مەملەكەتتىك ورگاندارمەن بىرلەسىپ الدىن الۋ جۇمىستارىن جۇرگىزۋدە. وڭىرلەردە قيىن ومىرلىك جاعدايعا تاپ بولعان وتباسىلاردى ەرتە انىقتاۋ بويىنشا ءموبيلدى توپتار قۇرىلدى.
سونىمەن قاتار، جاڭا زاڭ اياسىندا مادەنيەت جانە اقپارات مينيسترلىگى وتباسىن قولداۋ ورتالىقتارىنىڭ قىزمەتىن ۇيلەستىرىپ، ادىستەمەلىك باسشىلىق جاساۋدا. قازىرگى تاڭدا ەلدە 43 وتباسىن قولداۋ ورتالىعى جۇمىس ىستەيدى جانە قيىن ومىرلىك جاعدايعا تاپ بولعان وتباسىلاردى ەرتە انىقتاۋ ءۇشىن ءموبيلدى قوسىمشا سىناقتان وتكىزىلۋدە.
مينيسترلىك قازاقستاندىقتاردىڭ اراسىندا ادامگەرشىلىك جانە وتباسىلىق قۇندىلىقتاردى نىعايتۋ بويىنشا جۇمىسىن جالعاستىرۋدا. 2025-2027 جىلدارعا ارنالعان وتباسىن جانە نەكەنى ساقتاۋ مەن نىعايتۋ جونىندەگى ءىس-شارالار جوسپارى ازىرلەنىپ، قابىلداندى. بۇل جوسپار اجىراسۋدىڭ الدىن الۋعا جانە وتباسىلىق ومىرگە سانالى دايىندىق دەڭگەيىن ارتتىرۋعا باعىتتالعان.
جىل سايىن «مەرەيلى وتباسى» ۇلتتىق بايقاۋى وتكىزىلەدى. 11 جىل ىشىندە وعان قازاقستاننىڭ بارلىق وڭىرلەرىنەن 20 مىڭنان استام وتباسى قاتىستى.
2-8 قىركۇيەك ارالىعىندا وتباسى كۇنىنە ارنالعان اپتالىق ءوتتى. ونىڭ اياسىندا 2 مىڭنان استام ءىس-شارا ۇيىمداستىرىلىپ، وعان 300 مىڭنان استام ادام قامتىلدى.
2024 جىلعى جولداۋىندا مەملەكەت باسشىسى سانالى اتا-انا بولۋدىڭ ماڭىزدىلىعىن اتاپ ءوتىپ، بالالار تاربيەسىنە ەرەكشە نازار اۋدارۋعا شاقىردى. وسىعان بايلانىستى، مينيسترلىك جانە «اكەلەر وداعى» رەسپۋبليكالىق قوعامدىق بىرلەستىگى «تاربيە – تال بەسىكتەن» IX رەسپۋبليكالىق اكەلەر فورۋمىن وتكىزدى. فورۋمعا 200-دەن استام قاتىسۋشى – ساراپشىلار، ۇلگىلى اكەلەر، بەلسەندى ازاماتتار، پەداگوگتەر جانە ءبىلىم بەرۋ مەكەمەلەرىنىڭ باسشىلارى جينالدى.
مينيسترلىك «بالالار مەن جاستاردى تاربيەلەۋ: مەملەكەت، قوعام جانە وتباسى بىرلەسە ارەكەت ەتۋدە» اتتى حالىقارالىق كونفەرەنسيا ۇيىمداستىردى. كونفەرەنسيا قورىتىندىسى بويىنشا رەزوليۋسيا قابىلداندى.
گەندەرلىك ساياساتتى ىسكە اسىرۋ اياسىندا گەندەرلىك تەڭدىكتى نىعايتۋ جانە ايەلدەرگە قاتىستى كەمسىتۋشىلىكتى جويۋ بويىنشا جۇمىس جالعاسۋدا.
ايەلدەر مەن قىزداردىڭ كوشباسشىلىق الەۋەتىن جانە ساياسي بەلسەندىلىگىن ارتتىرۋ ماقساتىندا «توميريس» ءاقپاراتتىق-بىلىم بەرۋ باعدارلاماسى بويىنشا وقىتۋ جالعاسۋدا. بيىل شامامەن 500 ايەل قامتىلدى.
حالىقارالىق گەندەرلىك كۇن ءتارتىبىن ىسكە اسىرۋ اياسىندا اۋقىمدى جۇمىس اتقارىلۋدا. بيىل بۇۇ-نىڭ 1325-رەزوليۋسيالارىن ىسكە اسىرۋ جونىندەگى ءىس-شارالاردىڭ ۇلتتىق جوسپارى جاڭارتىلدى. بۇل جوسپارعا 34 ءىس-شارا ەنگىزىلدى جانە ول ساراپشىلار مەن ديپلوماتيالىق كورپۋس تاراپىنان جوعارى باعالاندى.
سونداي-اق، ەلدىڭ 19 وڭىرىندە ازاماتتىق قوعام، ساراپشىلار جانە بيزنەس قاۋىمداستىعى وكىلدەرىنىڭ اراسىنان اكىمدەردىڭ شتاتتان تىس گەندەرلىك تەڭدىك جونىندەگى كەڭەسشىلەرى تاعايىندالدى.
بۇدان بولەك، بيىل ەرلەر مەن ايەلدەردىڭ تەڭ قۇقىقتارى مەن مۇمكىندىكتەرىن قامتاماسىز ەتۋ جونىندەگى ق ر ۇكىمەتىنىڭ ءىس-قيمىل جوسپارى قابىلداندى