ەنەرگەتيكا ءمينيسترى الماسادام ساتقالييەۆ ب ا ق وكىلدەرىنە ەلدەگى مۇناي قورى تۋرالى مالىمەت بەردى.
مينيستر، الدىن الا بولجامدار بويىنشا، مۇناي قورى 100 جىلعا انىق جەتەتىنىن ايتتى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«الدىن الا بولجامدار بويىنشا، مۇناي 100 جىلعا انىق جەتەدى. ءبىراق بىزدە پەرسپەكتيۆالى بلوكتار بار. ۇكىمەت مەملەكەت باسشىسىنىڭ قولداۋىمەن جاڭا مودەلدەگى كەلىسىمشارت دايىندادى. ول بويىنشا جاڭا مۇناي كەنىشتەرىنە بارلاۋ جاساعاندارعا سالماقتى جەڭىلدىكتەر ۇسىنىلادى. كوپتەگەن كومپانيالار ول جەڭىلدىكتى پايدالاندى دا. جەكە ايتساق، «لۋكويل» سونداي كەلىسىمشارتقا قول قويدى»، - دەدى الماسادام ساتقالييەۆ ۇكىمەت كۋلۋارىندا.
مينيستر ءازىربايجان تاراپى دا قازاقستان اۋماعىندا مۇناي قورىن بارلاۋعا نيەتتى ەكەنىن ايتتى.
«ءازىربايجان پرەزيدەنتى يلحام الييەۆتىڭ ساپارى كەزىندە باكۋ دەلەگاسياسى قازاقستانعا ينۆەستيسيا سالۋعا نيەت ءبىلدىردى. ولار كومىرسۋتەك كوزدەرىن بارلاۋ، يگەرۋ تۋرالى جاڭا ماسەلەلەردى كوتەردى. ءقازىر ەنەرگياعا دەگەن سۇرانىستىڭ ارتىپ كەلە جاتقانىن ەسكەرسەك، رەسۋرس بازاسىن تولىقتىرۋعا قاراجات جۇمساۋدى جالعاستىرۋىمىز كەرەك»، - دەدى ساتقالييەۆ.
ايتا كەتەيىك، 12 ساۋىردەن باستاپ اي-92 جانە اي-93 بەنزينىنىڭ باعاسى ليترىنە 182-187 تەڭگەدەن 205 تەڭگەگە دەيىن شامامەن 11%-عا كوتەرىلەدى. ال ديزەل وتىنىنىڭ باعاسى 20 پايىزعا - 295 تەڭگەگە دەيىن قىمباتتايدى. ەگەر بۇرىن مۇناي ءوندىرۋشى قازاقستاندا بەنزين باعاسىنىڭ قىمباتتاۋى ەسكى مۇناي وڭدەۋ زاۋىتتارى مەن ولاردىڭ قۋاتتىلىعىنىڭ تومەندىگىمەن بايلانىستى دەپ ايتىلسا، ءقازىر بارلىق زاۋىتتاردى جاڭعىرتۋ اياقتالعان سوڭ، ۇكىمەتتىڭ پىكىرىنشە، قىمباتشىلىققا "سۇر ەكسپورت" سەبەپ بولىپ وتىر.