"داڭك" وردەنىن حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا يەلەندى.
بۇگىن ق ر پرەزيدەنتى سادىر جاپاروۆتىڭ قازاقستانعا رەسمي ساپارى اياسىندا قازاقستاننىڭ مادەنيەت قايراتكەرلەرىنە مەملەكەتتىك ناگرادالار تابىستاۋ ءراسىمى ءوتتى، دەپ حابارلايدى اlmaty-akshamy.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
سالتاناتتى ءىس-شارا بارىسىندا قىرعىز رەسپۋبليكاسىنىڭ مەملەكەتتىك حاتشىسى سۇيىنبەك قاسمامبەتوۆ مادەنيەت جانە ونەر وكىلدەرىن مەملەكەتتىك ناگرادالارمەن ماراپاتتاۋ عاسىرلارعا ۇلاسقان دوستىقتىڭ، ورتاق مادەنيەتتىڭ، دامىپ كەلە جاتقان ىنتىماقتاستىقتىڭ بەلگىسى ەكەنىن اتاپ ءوتتى. سونىمەن قاتار، مادەني-گۋمانيتارلىق بايلانىستاردىڭ قارقىندى دامۋىنا باعىتتالعان قادام رەتىندە قاراستىرىلۋى كەرەك ەكەنىن ءسوز ەتتى.قىرعىز رەسپۋبليكاسى مەن قازاقستان رەسپۋبليكاسى اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن قىرعىز رەسپۋبليكاسى پرەزيدەنتىنىڭ جارلىعىمەن:
قازاقستان رەسپۋبليكاسىنىڭ قوعام قايراتكەرى، مادەنيەتتانۋشى مۇرات اۋەزوۆ،
كورنەكتى اقىن، ديپلومات، قازاقستان رەسپۋبليكاسىنىڭ قىرعىز رەسپۋبليكاسىنداعى بۇرىنعى ەلشىسى مۇحتار شاحانوۆ "داناكەر" وردەنىمەن ماراپاتتالدى.
ال "دوستۋك" وردەنى:
پۋبليسيست، ادەبيەتتانۋشى، جۋرناليست، كينوسىنشى، قازاقستان رەسپۋبليكاسى پارلامەنتى ءماجىلىسىنىڭ بۇرىنعى دەپۋتاتى ساۋىتبەك ءابدىراحمانوۆقا،
قازاقستان رەسپۋبليكاسىنىڭ مەملەكەت جانە قوعام قايراتكەرى، تۇركىتانۋشى عالىم مىرزاتاي جولداسبەكوۆكە،
ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى، رەكتور جانسەيت تۇيمەبايەۆقا تابىستالدى.
"داڭك" وردەنىن حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا يەلەندى. سونداي-اق، "قىرعىز رەسپۋبليكاسىنىڭ حالىق ءارتىسى" قۇرمەتتى اتاعى قازاقستاندىق بەلگىلى كومپوزيتور التىنبەك قورازبايەۆقا، تانىمال ەسترادا ءانشىسى، كينواكتريسا روزا رىمبايەۆاعا بەرىلدى.
ءانشى روزا رىمبايەۆا مادەنيەتتىڭ شەكاراسى جوق ەكەنىن اتاپ ءوتتى.
"1996 جىلى ماعان قىرعىزستاننىڭ ەڭبەك سىڭىرگەن مادەنيەت قايراتكەرى اتاعى بەرىلدى. 28 جىلدان كەيىن 2قىرعىز رەسپۋبليكاسىنىڭ حالىق ءارتىسى" قۇرمەتتى اتاعىن الىپ وتىرمىن. بۇل مەن ءۇشىن ۇلكەن جەتىستىك"، – دەدى ول.
"تاڭ-شولپان" كوركەم-ادەبي جۋرنالىنىڭ رەداكتورلار كەڭەسىنىڭ ءتوراعاسى، باس ديرەكتورى ديدار قۇلكەنوۆ "داڭك" مەدالىمەن ماراپاتتالدى.