ماسكەۋ قالاسىندا حالىقارالىق ينجەنەرلىك اكادەميانىڭ جالپى وتىرىسى ءوتتى.
وعان 40-تان استام ەلدىڭ ۇلتتىق ينجەنەرلىك اكادەميالارىنىڭ وكىلدەرى قاتىستى، دەپ حابارلايدى aqshamnews.kz.
بۇل تۋرالى عىلىم جانە جوعارى ءبىلىم مينيسترلىگى مالىمدەدى.
وتىرىس بارىسىندا عىلىمي، ينجەنەرلىك جانە يننوۆاسيالىق قىزمەتتىڭ ناتيجەلەرى تالقىلاندى. قازاقستاننىڭ ۇلتتىق ينجەنەرلىك اكادەمياسىنىڭ اتىنان ءسوز العان تانىمال عالىم، فيزيكا-ماتەماتيكا عىلىمدارىنىڭ دوكتورى، ۇلتتىق ينجەنەرلىك اكادەمياسىنىڭ اكادەميگى تەمىربەكوۆ نۇرلان مۇحان ۇلى قازاقستان پرەزيدەنتى قاسىم-جومارت كەمەل ۇلى توقايەۆتىڭ ينجەنەرلىك سالانى دامىتۋعا قاتىستى قويعان باستامالارىنىڭ جۇزەگە اسىرىلۋى تۋرالى باياندادى. پرەزيدەنت قاسىم-جومارت توقايەۆ ينجەنەرلىك سالانى ەكونوميكالىق ءوسىم مەن ەلدىڭ تەحنولوگيالىق تاۋەلسىزدىگىنىڭ نەگىزى رەتىندە ايرىقشا ماڭىزدى دەپ اتاپ وتكەن بولاتىن.
سونىمەن قاتار حالىقارالىق ينجەنەرلىك اكادەمياسىنىڭ تولىق مۇشەلەرى مەن كوررەسپوندەنت-مۇشەلەرىن سايلاۋ ءوتتى.
قازاقستاننىڭ العاشقى عارىشكەرى، كورنەكتى سىناق ينجەنەرى، كەڭەس وداعىنىڭ باتىرى، حالىق قاھارمانى – اۋباكىروۆ توقتار وڭعارباي ۇلى، تانىمال حيميك عالىمدار – مانسۇروۆ زۇلحايىر ايمۇحامبەت ۇلى جانە مۋن گريگوريي الەكسەيەۆيچ، كورنەكتى ينجەنەر عالىم – بيجانوۆ نۇراحمەت كۋساينوۆيچ قازاقستاننان حالىقارالىق ينجەنەرلىك اكادەمياسىنىڭ تولىق مۇشەلەرى بولىپ سايلاندى.
دجومارتوۆ اسىلبەك ابدرازاق ۇلى، ناديروۆ اريف ناديروۆيچ، كۇلدەيەۆ ەرجان ىتەمەن ۇلى، نۇراحمەتوۆ باۋرجان قۇمارعالي ۇلى كوررەسپوندەنت-مۇشەلەر بولىپ سايلاندى.