ۇلتتىق ستاتيستيكا بيۋروسىنىڭ مالىمەتى بويىنشا، 2023 جىلعى قاڭتار-قىركۇيەك ارالىعىندا ەلىمىزدەگى كۋرورتتى ايماقتارعا 3 ملن 73 مىڭنان استام ادام بارعان.
بۇل – 2022 جىلعى كورسەتكىشپەن سالىستىرعاندا 344 مىڭ ادامعا كوپ. ياعني، 2022 جىلعى سايكەس كەزەڭ بويىنشا ءوسىم 12،6%-عا ارتقان. 2022 جىلدىڭ 9 ايىندا ەلىمىزدەگى كۋرورتتارعا 2 ملن 729 مىڭ ادام كەلگەن، دەپ حابارلايدى اlmaty-akshamy.kz.
وسى ورايدا، نازارلارىڭىزعا 2023 جىلعى قاڭتار-قىركۇيەك ارالىعىندا تۋريستەر كوپ بارعان قازاقستاننىڭ ەڭ تانىمال توپ-5 كۋرورتتى ايماعىن ۇسىنامىز. 2023 جىلعى العاشقى 9 ايدىڭ قورىتىندىسى بويىنشا، الماتى تاۋ كلاستەرى ەلىمىزدەگى ەڭ تانىمال كۋرورتتى ايماق دەپ تانىلدى. وتكەن جىلدىڭ قاڭتار-قىركۇيەك ارالىعىندا الماتى تاۋ كلاستەرىنە 1 ملن 728 مىڭ تۋريست كەلگەن. رەيتينگتىڭ ەكىنشى ورنى ماڭعىستاۋ كۋرورتتارىنا تيەسىلى. ەلىمىزدىڭ باتىس ايماعىنداعى كۋرورتتى مەكەنگە 299 مىڭ ادام بارعان. ءۇشىنشى ورىنعا 243 مىڭ تۋريست قابىلداعان ششۋچە-بۋراباي كۋرورتتى ايماعى جايعاستى. سونىمەن قاتار ۇزدىك بەستىكتىڭ قاتارىنا ەلىمىزدەگى ەڭ تانىمال ەكى جازعى دەمالىس ورنى ەنىپ وتىر. الاكولدىڭ اباي وبلىسىنداعى بولىگىنە توعىز ايدا 204 مىڭ تۋريست كەلسە، بالقاش كۋرورتتىق ايماعىنا 94 مىڭ ساياحاتشى بارعان.
«كەيىنگى جىلدارى قازاقستاننىڭ ىشكى ءتۋريزمى قارقىندى دامىپ كەلەدى. ەلىمىزدەگى كۋرورتتار تەك وتاندىق دەمالۋشىلاردىڭ عانا ەمەس، شەتەلدىك قوناقتاردىڭ دا قىزىعۋشىلىعىنا يە. مينيسترلىك بۇل كورسەتكىشتەردى مەملەكەتتىك قولداۋ ءىس-شارالارى اياسىندا ۇلعايتۋعا مۇددەلى. بۇگىنگى تاڭدا كەز كەلگەن تۋريست ءۇشىن دەمالىس ورنىن تاڭداۋداعى نەگىزگى كريتەرييلەردىڭ ءبىرى – ينفراقۇرىلىم ەكەنى بەلگىلى. سوندىقتان تۋريستىك ورىندارداعى ينفراقۇرىلىمدى جاقسارتۋ بويىنشا جۇمىستار ءارى قاراي دا جالعاسا بەرمەك. وكىنىشكە قاراي، كەيبىر كۋرورتتاردىڭ الەۋەتى ءالى دە تولىق اشىلماعان. مىسالى، كاتونقاراعاي كۋرورتتى ايماعىنىڭ تابيعاتى جوعارىدا اتالعان تۋريستىك ورىنداردان ەش كەم تۇسپەيدى. ءبىراق وتكەن جىلدىڭ 9 ايىندا كاتونقاراعايعا نەبارى 7،8 مىڭ ادام كەلگەن»، - دەدى تۋريزم جانە سپورت ءمينيسترىنىڭ ورىنباسارى ەرجان ەركىنبايەۆ.
ستاتيستيكالىق مالىمەتتەر بويىنشا، كۋرورتتى ايماقتارداعى ورنالاستىرۋ ورىندارىندا كورسەتىلگەن قىزمەتتەردىڭ تابىسى دا وسكەن. 2022 جىلعى قاڭتاردان قىركۇيەككە دەيىن كۋرورتتى ايماقتاردىڭ كوناق ۇيلەرى 74 ملرد تەڭگەدەن استام سوماعا قىزمەت كورسەتسە، 2023 جىلدىڭ وسى كەزەڭىندە كورسەتكىش 29 ملرد تەڭگەگە ءوسىپ، تابىس 103 ملرد تەڭگەگە جەتكەن. جىلدىق ءوسىم – 39%.