وتكەن ايدا بوس جۇمىس ورىندارىنىڭ سانى 1،5 ەسە وسكەن.
وتكەن ايدا قازاقستاندا بوس جۇمىس ورىنداردىڭ سانى ارتقان. جۇمىس ىستەيتىن ماماندارعا اۋىل شارۋاشىلىعى مۇقتاج بولىپ وتىر، دەپ حابارلايدى Almaty-akshamy.kz.
«2022 جىلعى ماۋسىمدا ەلەكتروندىق ەڭبەك بيرجاسىندا 124،6 مىڭ بوس جۇمىس ورنى جانە 59،9 مىڭ تۇيىندەمە ورنالاستىرىلدى. وتكەن ايمەن سالىستىرعاندا بوس ورىندار سانى 1،5 ەسە، ال وزەكتى تۇيىندەمەلەر سانى 31%-عا ارتتى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، بوس جۇمىس ورىندارى سانىنىڭ كۇرت ءوسۋى بارلىق وڭىرلەردە بايقالدى، ءبىراق ەڭ كوبى اقتوبە (2،5 ەسە) جانە جامبىل (3 ەسەگە جۋىق) وبلىستارىندا بايقالىپ وتىر.
«ناتيجەسىندە اتالعان وڭىرلەر بوس جۇمىس ورىندارى بويىنشا ءبىرىنشى ورىنعا شىقتى (تيىسىنشە 12،9 مىڭ جانە 12 مىڭ بوس جۇمىس ورنى). قاراعاندى وبلىسى دا بوس جۇمىس ورىندارى بويىنشا الدىڭعى قاتارعا جايعاستى (12،6 مىڭ). بۇل رەتتە باتىس قازاقستان وبلىسىندا كاسىپورىندار مەن فيرمالاردىڭ ۇسىنىسى 5،8%-عا – 3،3 مىڭ بوس ورىنعا دەيىن ازايدى. سونداي-اق، ۇسىنىلاتىن جۇمىس ورىندارىنىڭ ەڭ از سانى شىمكەنت قالاسىندا – 3،5 مىڭ جانە ماڭعىستاۋ وبلىسىندا-3،1 مىڭ بوس ورىن»، – دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
بوس ورىنداردىڭ باسىم بولىگىن اۋىل شارۋاشىلىعى (10،8 مىڭ بوس ورىن)، تۇرعىن ەمەس ءۇي-جايلار جانە تۇرعىن ءۇي وبەكتىلەرىن سالۋ (9،8 مىڭ بوس ورىن)، ءبىلىم بەرۋ (6،6 مىڭ بوس ورىن) جانە وزگە دە قىزمەتتەر (5،8 مىڭ بوس ورىن) سەكتورلارىنىڭ كاسىپورىندارى ورنالاستىردى. بۇل رەتتە اۋىل شارۋاشىلىعى سالاسىندا ورنالاستىرىلعان بوس ورىنداردىڭ جارتىسىنا جۋىعى (47%) جامبىل وبلىسىنا، ال شىعىس قازاقستان جانە قوستاناي وبلىستارىندا – تۇرعىن ءۇي قۇرىلىسى سالاسىندا تيىسىنشە 33،7% جانە 35%-دان كەلدى. ەلوردادا قۇرىلىس سالاسىنداعى جۇمىسشىلارعا جوعارى سۇرانىس ساقتالدى، ياعني بوس ورىنداردىڭ ۇشتەن ءبىرى قۇرىلىس سالاسىنا تيەسىلى.