ءاربىر اسكەري كورابلدى جورىققا دايىنداۋدىڭ وزىندىك ەرەكشەلىكتەرى بار.
تەڭىزگە شىعۋدى كوزدەيتىن قازاقستاندىق اسكەريلەر ارنايى جاتتىعۋعا قاتىسىپ جاتىر، دەپ حابارلايدى Almaty-akshamy.kz.
«اسكەري-تەڭىز كۇشتەرى كورابلدەرىنىڭ، كاتەرلەرى مەن كەمەلەرىنىڭ ەكيپاجدارى ورنالاسقان پۋنكتەرىندە كورابلدىك وقۋ-جاتتىعۋلاردى وتكىزۋگە كىرىستى. ارنايى ك-1 كۋرستىق تاپسىرماسى كەمەنى جۇزۋگە دايىنداۋدى، بازانىڭ جاعدايىندا جاۋىنگەرلىك جانە كۇندەلىكتى ۇيىمداستىرۋدى پىسىقتاۋدى قامتيدى. ول ءساتتى ورىندالعان سوڭ تەڭىزگە شىعۋعا رۇقسات بەرىلەدى»، - دەلىنگەن قورعانىس مينيسترلىگى باسپا ءسوز قىزمەتىنىڭ حابارلاماسىندا.
كورابلدەردىڭ ەكيپاجدارى جاۋىنگەرلىك مىندەتتەردى ورىنداۋدان داعدىلارىن جەتىلدىرىپ، ونىڭ ومىرشەڭدىگى ءۇشىن كۇرەسۋدەن، سونداي-اق رادياسيالىق، حيميالىق جانە بيولوگيالىق قورعانۋدان نورماتيۆتەردى پىسىقتايدى. ديۆەرسياعا قارسى جانە اۋە شابۋىلىنا قارسى قورعانىس شارالارىنا دا ەرەكشە كوڭىل بولىنەدى.
«اسكەري-تەڭىز كۇشتەرىندە كۋرستىق تاپسىرمانى ورىنداۋ – كورابلدەردى جانە قوسىمشا كەمەلەردى دايىنداۋ باعدارلاماسىنىڭ ماڭىزدى كەزەڭى. ەكيپاجدارمەن ساباقتار ۇدايى تۇردە وتكىزىلەدى، سەبەبى ءاربىر اسكەري كورابلدى جورىققا دايىنداۋدىڭ وزىندىك ەرەكشەلىكتەرى بار»، – دەپ ءتۇسىندىردى «قازاقستان» زىمىران-ارتيللەريالىق كورابلىنىڭ كومانديرى 3-دارەجەلى كاپيتان رۋسلان ياحياروۆ.
ەكيپاجدار دايارلىقتىڭ كەلەسى كەزەڭىندە كاسپيي تەڭىزىنىڭ قازاقستاندىق سەكتورىندا وقۋ-جاۋىنگەرلىك مىندەتتەردى ورىندايدى.