ەلىمىزدىڭ ءۇش پوليگونىندا، ازەربايجانعا قارايتىن سۋ اۋماعىندا، ارمياننىڭ ديليجانىندا، كاباردينو-بالكاريا مەن ماسكەۋ وبلىسىندا قازاقستاندىق جاۋىنگەرلەر حالىقارالىق ارميا ويىندارىنا قاتىسىپ، جاقسى ناتيجەلەر كورسەتىپ جاتىر.
بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
قاراعاندى وبلىسىندا ءوتىپ جاتقان «تاكتيكالىق مەرگەن» بايقاۋىنىڭ كەزەكتى كەزەڭىندە قازاقستان كومانداسى جەڭىسكە جەتتى. ەكى جاۋىنگەر جارىسىندا اسكەري قىزمەتشىلەر توسقاۋىلعا تۇسكەن كەزدەگى تاكتيكالىق جانە اتىس تاپسىرمالارىن ورىندادى. قاتىسۋشىلار قالقالانا وتىرىپ جىلجىپ، نىساناعا وق جاۋدىردى. قازاقستاندىق جاۋىنگەرلەردىڭ ناتيجەلى ارەكەتتەرى بايقاۋدىڭ سوڭعى كەزەڭىندە ولاردى جەڭىسكە جەتكىزدى. ەكىنشى ورىندا – رەسەي اسكەري قىزمەتشىلەرى، ءۇشىنشى ورىندا – جۇڭگو.
ازەربايجان رەسپۋبليكاسىنىڭ پۋتا اسكەري-تەڭىز بازاسى اۋماعىنداعى تەڭىز پوليگونىندا ءسۋۇستى كەمەلەرى ەكيپاجدارىنىڭ «تەڭىز كۋبوگى» اتتى سايىسى جالعاسۋدا. اسكەري تەڭىزشىلەر اۋە نىساناسىنا ارتيللەريادان وق اتتى. بۇل تاپسىرمانى جارىستىڭ بارلىق قاتىسۋشىلارى ءساتتى ورىنداپ، 45 ۇپايدان جينادى. ءۇش جاتتىعۋدىڭ قورىتىندىسى بويىنشا قازاقستاندىق تەڭىزشىلەر 132 ۇپاي سانىمەن ەكىنشى ورىندا. ءبىرىنشى ورىندى تەڭدەي 135 ۇپاي جيناعان ازەربايجان مەن رەسەي كەمەلەرىنىڭ ەكيپاجدارى ءوزارا ءبولىستى.
كاباردينو-بالكارياداعى «تەرسكول» تاۋ دايىندىعى جانە امان قالۋ وقۋ-جاتتىعۋ ورتالىعىندا ءوتىپ جاتقان «ەلبرۋس شەڭبەرى» بايقاۋىندا اسكەري قىزمەتشىلەر تاۋداعى كەدەرگىلەردەن ءوتىپ، توپ قۇرامىندا اتىس جاتتىعۋىن ورىندادى. جارىستىڭ التى ارنايى تاپسىرماسىن ورىنداعاننان كەيىن قازاقستان كومانداسى باسەكەلەستەرىنەن ءسال ارتتا قالىپ، ءتورتىنشى ورىنعا تابان تىرەدى. ءبىرىنشى ورىندى – رەسەي، ەكىنشى ورىندى – وزبەكستان، ءۇشىنشى ورىندى – جۇڭگو الپينيستەرى يەلەندى. الدا جاۋىنگەرلەرگە تاۋداعى اسا كۇردەلى جارىس كەزەڭى وتكىزىلەدى، ناتيجەسىنە سايكەس بايقاۋدىڭ جەڭىمپازدارى مەن جۇلدەگەرلەرى انىقتالادى.
ارميان ەلىنىڭ ديليجان پوليگونىنداعى «بەيبىتشىلىك جاۋىنگەرىندە» «ەرۋديت» زياتكەرلىك كەزەڭى اياقتالدى. اسكەري تاريحتى، گەوگرافيانى، حالىقارالىق گۋمانيتارلىق قۇقىقتى، الەمدىك ونەر مەن ادەبيەتتى بىلۋگە ارنالعان جارىستا قازاقستاندىق جاۋىنگەرلەر رەسەي مەن بەلارۋس اسكەري قىزمەتشىلەرىنەن كەيىنگى ءۇشىنشى ورىنعا تۇراقتادى. الدا شەشۋشى جارىستار وتەتىن بولادى، سوندىقتان ءالى قازاقستاندىق كوماندانىڭ جەڭىسكە جەتۋگە دەگەن مۇمكىندىگى بار.