كولىك مينيسترلىگىندە قالاارالىق جانە قالا ماڭىنداعى جولاۋشىلار تاسىمالى، تاكسوپاركتەر جانە تاكسي اگرەگاتورلارى سالاسىنداعى اۆتوۆوكزالدار مەن كولىك كومپانيالارىنىڭ وكىلدەرىمەن كەزدەسۋ ءوتتى.
مينيستر مارات قارابايەۆتىڭ توراعالىعىمەن وتكەن كەزدەسۋدە ماماندار قالاارالىق، وبلىسارالىق جانە اۋدانارالىق باعىتتارداعى جولاۋشىلاردىڭ قاۋىپسىزدىگىن ارتتىرۋ ماسەلەلەرىن، سونداي-اق زاڭدى جولاۋشىلار تاسىمالىن دامىتۋ جونىندەگى يدەيالاردى جانە كوروناۆيرۋس پاندەمياسىنان كەيىنگى اۆتوبۋس ستانسيالارىنىڭ قىزمەتىن قولداۋ ماسەلەلەرى تالقىلاندى.
جينالىسقا جۇزدەن استام ادام قاتىسىپ، قاتىسۋشىلار ەركىن فورماتتا پروبلەمالىق ماسەلەلەردى شەشۋ جولدارى مەن ۇسىنىستارىن ورتاعا سالدى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
«تراسسالاردا ولىم-جىتىمگە اكەلەتىن جول-كولىك اپاتتارىنىڭ ءوسۋى ەرەجەلەر ساقتالماعان زاڭسىز تاسىمالداۋ كولەمىنىڭ ارتۋىمەن ءبىر مەزگىلدە ورىن الۋدا. سوندىقتان تاسىمالداۋ سالاسىنداعى تەتىكتەردى رەتتەپ، ونىڭ ىشىندە ۆوكزال شارۋاشىلىعىنىڭ تولىققاندى جۇمىس ىستەۋىن جۇيەلەۋ قاجەت. وسى رەتتە سىزدەرمەن اشىق تالقىلاۋ ۇيىمداستىرىپ وتىرمىز»، –دەدى كولىك مينيسترلىگىنىڭ باسشىسى.
تالقىلاۋ بارىسىندا رەسمي جۇمىس ىستەيتءىن اۆتوستانسيالاردىڭ جۇمىسىندا ورىن العان تەرەڭ داعدارىس ماسەلەسى اتاپ ءوتىلدى. بۇگىنگى تاڭدا اۆتوۆوكزالدار قازاقستاننىڭ 3 وبلىسىندا عانا ءتيىستى دەڭگەيدە جۇمىس ىستەپ تۇر. رەسمي تاسىمالدار سالاسى بەيرەسمي تاسىمالداۋشىلارمەن جانە اگرەگاتورلارمەن سالىستىرعاندا سالىقتاردى تولەۋ، جولاۋشىلاردى ساقتاندىرۋ، جۇرگىزۋشىلەردى مەديسينالىق كۋالاندىرۋ، اۆتوبۋستاردى رەيس الدىنداعى تەكسەرۋ، تەحنيكالىق بازانى ۇستاۋبويىنشا تەڭ باسەكەلەستىكتى جوعالتىپ وتىر.
زاڭدى تاسىمالداۋشىلار دا وسىنداي سەبەپتەرگە بايلانىستى زاڭسىز تاسىمالداۋشىلارمەن باسەكەلەستىككە توتەپ بەرە المايدى. كولەڭكەلى تاسىمالداۋشىلار قازاقستاندىق زاڭنامانىڭ تالاپتارىن ورىنداۋ، جۇرگىزۋشىلەردى الەۋمەتتىك قامتاماسىز ەتۋ، تاسىمالداۋ قاۋىپسىزدىگى سياقتى فاكتورلارعا نازار اۋدارا قويمايدى. جالپى العاندا، بۇل ولارعا ۇنەمدەۋگە ايتارلىقتاي مۇمكىندىك بەرىپ، تاسىمالداۋ قىزمەتتەرى ءۇشىن تومەن باعالار ۇسىنۋ ءتۇرىندەگى ارتىقشىلىقتار بەرەدى.
كەزدەسۋگە قاتىسقان اۆتوبۋس جانە تاكسي جۇرگىزۋشىلەرى تاعى ءبىر ماڭىزدى ماسەلەگە توقتالدى. اتاپ ايتقاندا، زاڭسىز تاسىمالداۋ قىلمىستىق ارەكەتتەرگە جول اشاتىنى ءسوز بولدى. ياعني، كولەڭكەلى سالادا جۇرگەن جۇرگىزۋشىلەر ارقىلى جىبەرىلەتىن ادەتتەگى سالەمدەمەلەردىڭ اراسىندا تىيىم سالىنعان زاتتار تاسىمالدانۋى مۇمكىن، سونىمەن بىرگە قانداي دا ءبىر زاڭتالاپتارىن بۇزعان ادامداردىڭ قوزعالىسىنا ىقپال ەتىپ، ولارعا ىزدەۋ سالعان قىزمەتكەرلەردىڭ جۇمىستارىن قيىنداتادى.
سونىمەن قاتار inDrive جانە ياندەكس تاكسيمەن ىنتىماقتاساتىن جۇرگىزۋشىلەر مينيسترگە جولدارداعى اپاتتىلىقتىڭ وسۋىنە ىقپال ەتەتىن اگرەگاتورلار جۇمىسىنىڭ ەرەكشەلىكتەرى تۋرالى ايتىپ بەردى. ولاردىڭ ايتۋىنشا، كومپانيالاردىڭ ءبىرى سەرىكتەستەردى شامادان تىس جۇمىس جاساۋعا ماتەريالدىق تۇرعىدا ىنتالاندىرادى ەكەن. جۇيەدە ارنايى اكسيالار تۋرالى حابارلامالار جاريالانىپ، ونىڭ شارتتارىنا سايكەس جۇرگىزۋشىلەر بەلگىلى ءبىر تاپسىرىستاردى ورىنداعانى ءۇشىن جاقسى بونۋستارعا يە بولادى. ماسەلەن، اپتاسىنا جاسالعان 180 جانە 300 ساپار ءۇشىن سىياقى قاراستىرىلعان. ءبىرىنشى جاعدايدا شارتتاردى ورىنداۋ ءۇشىن كۇن سايىن ءۇزىلىسسىز شامامەن 12-13 ساعات، ال ەكىنشىسىندە - 21-22 ساعات جۇمىس ىستەۋ كەرەك. وسىنداي ىنتالاندىرۋلار مەن كوميسسيالىق ۇستاۋدىڭ جوعارى مولشەرىنە بايلانىستى جۇرگىزۋشىلەر قوسىمشا كىرىس ءۇشىن كادىمگىدەي بايگە ۇيىمداستىرىپ، ناتيجەسىندە جول-كولىك اپاتتارىنىڭ سانى ارتا تۇسەدى.
نارىق قاتىسۋشىلارى مەن مينيسترلىك قىزمەتكەرلەرىنىڭ اڭگىمەسى شامامەن 4 ساعاتقا سوزىلدى. نەگىزگى جانە باستى تالاپتاردىڭ ءبىرى – تاسىمالداۋ نارىعىنىڭ بارلىق قاتىسۋشىسى ءۇشىنتەڭ مۇمكىندىكتەر قۇرۋ جانە زاڭ تالاپتارىنىڭ ساقتالۋىن بارىنشا قامتاماسىز ەتۋ.
تالقىلاۋ قورىتىندىسى بويىنشا جولاۋشىلار تاسىمالىنىڭ قاۋىپسىزدىگىن ارتتىرۋ جانە تاسىمالداۋ نارىعىنداعى ەكونوميكالىق جاعدايدى جاقسارتۋ بويىنشا ءبىرقاتار ۇسىنىس قابىلداندى. اتالعان ۇسىنىستار جاقىن ارادا «اۆتوۆوكزالدار»، «اۆتوبۋس تاسىمالداۋشىلارى» جانە «تاكسوپاركتەر مەن جۇرگىزۋشىلەر» سىندى جەكەلەگەن كىشى توپتار اراسىندا ەگجەي-تەگجەيلى قارالاتىن بولادى.