«قانت اكەتۋدىڭ كەيبىر ماسەلەلەرى تۋرالى» قازاقستان رەسپۋبليكاسى اۋىل شارۋاشىلىعى ءمينيسترىنىڭ 2024 جىلعى 11 ماۋسىمداعى № 196 بۇيرىعىمەن 2024 جىلعى 31 تامىزعا دەيىن ەل اۋماعىنان، ونىڭ ىشىندە ەۋرازيالىق ەكونوميكالىق وداققا مۇشە مەملەكەتتەرگە قانت اكەتۋگە ۋاقىتشا شەكتەۋ ەنگىزىلدى.
شەكتەۋ ق ر اۋماعى ارقىلى حالىقارالىق قانت ترانزيتىنە، سونداي-اق قازاقستان رەسپۋبليكاسىنىڭ اۋماعى ارقىلى ەۋرازيالىق ەكونوميكالىق وداققا مۇشە ءبىر مەملەكەتتىڭ اۋماعىنان ەۋرازيالىق ەكونوميكالىق وداققا مۇشە باسقا مەملەكەتتىڭ اۋماعىنا قانت تاسىمالداۋعا قاتىستى قولدانىلمايدى.
بۇيرىق 2024 جىلعى 14 ماۋسىمنان باستاپ كۇشىنە ەندى، دەپ حابارلايدى Almaty-akshamy.kz.
قانت شىعارۋعا ۋاقىتشا شەكتەۋ شارالارىن بەلگىلەۋ تۋرالى شەشىم سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيادا 2024 جىلعى 6 مامىردا قابىلداندى.
ايتا كەتەيىك، جازعى كەزەڭدە ىشكى نارىقتا قانت تۇتىنۋدىڭ حالىق تاراپىنان دا، يندۋستريالىق تۇتىنۋشىلار تاراپىنان دا ءوسۋى بايقالادى. وسىعان بايلانىستى، قانت اكەتۋگە ۋاقىتشا تىيىم سالۋ ىشكى نارىقتى قامتاماسىز ەتۋ جانە ونىڭ كەرى ەكسپورتىن بولدىرماۋ ماقساتىندا ەنگىزىلدى.
تۇتاستاي العاندا، قازىرگى ۋاقىتتا ەلدەگى قانت قورى قانت قىزىلشاسىنىڭ جاڭا ءونىمى باستالعانعا دەيىن قانتقا دەگەن سۇرانىستى قامتاماسىز ەتۋ ءۇشىن جەتكىلىكتى.
بۇدان بولەك، وتاندىق قانت زاۋىتتارى قانت ءوندىرۋ ءۇشىن ءۇشىنشى ەلدەردەن قامىس شيكىزاتىن اكەلۋدى جۇزەگە اسىرادى.
قازىرگى ۋاقىتتا مينيسترلىك ونەركاسىپتىك قايتا وڭدەۋ ءۇشىن شيكى قانتتى باجسىز اكەلۋگە وتىنىمدەر قابىلداۋدى جالعاستىرۋدا.
ەستەرىڭىزگە سالا كەتەيىك، ەەك اياسىندا قازاقستان رەسپۋبليكاسى ءۇشىن اعىمداعى جىلى 300 مىڭ توننا كولەمىندە شيكى قانت باجسىز اكەلۋگە كۆوتا كەلىسىلدى.