كۇنباعىس تۇقىمىن ۇلكەن كولەمىن ەكسپورتتاۋ ءقاۋپى از.
ۆەدومستۆوارالىق كوميسسيا قازاقستاننان كۇنباعىس مايىن ەكسپورتتاۋعا شەكتەۋ مەرزىمىن ۇزارتپاۋ تۋرالى شەشىم قابىلدادى، دەپ حابارلايدى Almaty-akshamy.kz «اتامەكەن» ۇكپ-نىڭ باسپا ءسوز قىزمەتىنە سىلتەمە جاساپ.
ۆەدومستۆوارالىق كوميسسيانىڭ وتىرىسىندا قازاقستان رەسپۋبليكاسىنىڭ اۋماعىنان كۇنباعىس تۇقىمى مەن مايىن ەكسپورتتاۋعا شەكتەۋ شارالارى تالقىلاندى. «اتامەكەن» ۇكپ باسقارما ءتوراعاسىنىڭ ورىنباسارى تيمۋر جاركەنوۆ وسى ماسەلەگە قاتىستى كاسىپكەرلەردىڭ پوزيسياسىن جەتكىزدى.
«كۇنباعىس تۇقىمىنىڭ باعاسى بۇرىن تونناسىنا 240 مىڭ تەڭگەنى قۇراعان، ءقازىر تونناسى 210 مىڭ تەڭگەگە ساتىلىپ، باعا تومەندەۋىن جالعاستىرىپ جاتىر. ەگەر يمپورتتىق ونىممەن سالىستىراتىن بولساق، وندا رەسەيلىك تۇقىم 185 مىڭ تەڭگەگە ساتىلادى. قازاقستاندا جوعارى ونىمدىلىككە قاراماستان، رەسەيمەن ايتارلىقتاي باسەكەلەستىك قىزىپ تۇر. ارزان كۇنباعىس تۇقىمى بىزگە كورشىلەردەن كوپ كەلەدى دەگەن الاڭداۋشىلىق بار. ماسەلەن، وتكەن جىلى كۇنباعىس ءونىمى 1،1 ملن توننانى قۇرادى، بيىل - 1،3 ملن توننا. رەسەي فەدەراسياسىندا ءونىمنىڭ ارتۋىنا بايلانىستى وسىنداي جاعداي بايقالادى»، - دەدى جاركەنوۆ.
سونىمەن قاتار ۇلتتىق پالاتانىڭ وكىلى فەرمەرلەردىڭ تاۋار وندىرۋگە جۇمساعان شىعىندارىنا توقتالدى. سپيكەردىڭ ايتۋىنشا، كۇنباعىس تۇقىمىنىڭ قۇنى 2021 جىلمەن سالىستىرعاندا تونناسىنا 120 مىڭ تەڭگەدەن 180-185 مىڭ تەڭگەگە دەيىن ءوستى. بۇل تەحنيكا، جانارماي، قوسالقى بولشەكتەر، اگروحيميا باعاسىنىڭ ورتا ەسەپپەن 50%-عا وسۋىنەنەن قىمباتتادى. كورشىلەرمەن باسەكەلەستىككە بايلانىستى كاسىپكەرلەردىڭ ءونىمى ارتىعىمەن جينالىپ قالۋى مۇمكىن. سول سەبەپتى ءقازىر كۇنباعىس تۇقىمى مەن كۇنباعىس مايىن سىرتقا شىعارۋعا شەكتەۋ مەرزىمىن ۇزارتپاۋ ۇسىنىلدى.
«ازىق-تۇلىك قاۋىپسىزدىگى ءۇشىن جاعدايدى باقىلاۋ قاجەت. مىسالى، كاسىپكەرلەردىڭ بيداي ماسەلەسىنە قاتىستى الاڭداۋشىلىعى بولاتىنىن اتاپ وتكىم كەلەدى. بيدايدىڭ وزىندىك قۇنى 120 مىڭ تەڭگەگە دەيىن بولعان كەزدە ەلدە باعا 120 مىڭ تەڭگەگە دەيىن تومەندەدى، ياعني وزىندىك قۇنى ءونىمدى ساتۋ باعاسىنا تەڭ بولدى. رەسەيلىك استىق بىزگە 110 مىڭ تەڭگە باعادا كەلەدى. ونىڭ سەبەبى بەلگىلى»، – دەپ اتاپ ءوتتى ساراپشى.
ءوز كەزەگىندە ەكسپورتتىق رەتتەۋ، سونىڭ ىشىندە ەكسپورتتىق كەدەندىك باج تۇرىندەگى تاريفتىك شارالاردى ەنگىزۋ ىشكى باعا بەلگىلەۋگە دە كەرى اسەرىن تيگىزەدى. ەكسپورتتاۋشىلار ساتىپ الۋ باعاسىن تومەندەتە وتىرىپ، باج شىعىنىن يمپورتتاۋشىلاردىڭ، وتاندىق اۋىل شارۋاشىلىعى وندىرۋشىلەرىنىڭ ەسەبىنەن ءوندىرىپ الۋعا ءماجبۇر بولادى.
«جىل سوڭىنا دەيىن فەرمەرلەر اگرارلىق نەسيە كورپوراسياسى مەن باسقا قارجى ينستيتۋتتارى الدىنداعى كوكتەمگى ەگىس جۇمىستارىنا العان قىسقا مەرزىمدى قارىزىن جابۋى، سونداي-اق كەلەسى ماۋسىمعا قاراجات سالۋى كەرەك. سوندىقتان ديقانداردىڭ باستى ماقساتى – وسىرىلگەن ءونىم ءۇشىن لايىقتى باعا الۋ. لوگيستيكا پروبلەماسىن: ۆاگونداردىڭ تاپشىلىعى، قتج-نىڭ قحر باعىتىندا وتىنىمدەردى قابىلداۋعا تىيىم سالۋى، ۆاگونداردىڭ قوزعالۋ جىلدامدىعىنىڭ تومەندىگىن ەسكەرسەك، كۇنباعىس تۇقىمىن ۇلكەن كولەمىن ەكسپورتتاۋ ءقاۋپى از»، - دەگەن سەنىمدە ۇقك.