گرۋزيانىڭ پرەمەر-مينيسترى كەلەسى ايدىڭ اياعىندا قازاقستانعا كەلۋدى جوسپارلاپ وتىر
قاسىم-جومارت توقايەۆ قاتار ەكونوميكالىق فورۋمى اياسىندا گرۋزيانىڭ پرەمەر-مينيسترى يراكليي گاريباشۆيليمەن كەزدەسۋ وتكىزدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋدە ەكىجاقتى ىقپالداستىقتىڭ وزەكتى ماسەلەلەرى تالقىلاندى.
«ءسىزدىڭ نازارىڭىزدى مىناداي باعىتتارداعى ىنتىماقتاستىقتى دامىتۋ پەرسپەكتيۆالارىنا اۋدارعىم كەلەدى. اتاپ ايتقاندا، ءوزارا ساۋدا كولەمىن ۇلعايتۋ. مەنىڭ ويىمشا، ءبىز ونىمدەردى ءوزارا جەتكىزۋدى ارتتىرا الامىز. قازاقستانعا جانە ورتالىق ازيانىڭ باسقا دا ەلدەرىنە تاۋار جەتكىزۋ جاعىنان گرۋزيانىڭ ۇلكەن قورى بار. وسى باعىتتا تىعىز جۇمىس ىستەۋگە دايىنبىز»، – دەدى قاسىم-جومارت توقايەۆ.
مەملەكەت باسشىسى كولىك-لوگيستيكا سالاسىندا، اتاپ ايتقاندا قازاقستاننىڭ اقتاۋ جانە قۇرىق ايلاقتارىنىڭ، سونداي-اق باتۋمي تەڭىز ايلاعىنىڭ الەۋەتىن پايدالانا وتىرىپ، ەكى ەل اراسىنداعى جۇك تاسىمالىن بىرلەسىپ جۇزەگە اسىرۋدىڭ ماڭىزدى ەكەنىن اتاپ ءوتتى.
ءوز كەزەگىندە يراكليي گاريباشۆيلي دوحادا كەزدەسۋگە ۋاقىت بولگەنى ءۇشىن قاسىم-جومارت توقايەۆقا العىس ءبىلدىرىپ، گرۋزيانىڭ قازاقستانمەن اراداعى كوپجاقتى ءارى ءوزارا ءتيىمدى ىنتىماقتاستىقتى ودان ءارى دامىتۋعا ءازىر ەكەنىن راستادى. گرۋزيانىڭ پرەمەر-مينيسترى كەلەسى ايدىڭ اياعىندا قازاقستانعا كەلۋدى جوسپارلاپ وتىر.