ستاتيستيكالىق دەرەكتەر بويىنشا اعىمداعى جىلدىڭ ءبىرىنشى جارتىجىلدىعىنىڭ قورىتىندىلارى بويىنشا بيداي يمپورتى 1،3 ملن. توننانى قۇرادى.
بۇل ءىس جۇزىندە 2023 جىلعى يمپورتتىڭ جىلدىق كولەمىنە تەڭ، ال قازاقستاننىڭ ىشكى نارىعىندا وتكەن جىلعى ەگىننىڭ بيداي قورى جەتكىلىكتى، دەپ حابارلايدى aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
ماسەلەن، ستاتيستيكا دەرەكتەرى بويىنشا اعىمداعى جىلدىڭ 1 شىلدەسىنە رەسپۋبليكا بويىنشا شامامەن 6،1 ملن توننا استىق قورى، ونىڭ ىشىندە بيداي – 5،1 ملن.توننا، ونىڭ ىشىندە ازىق – تۇلىك ماقساتىنداعى بيداي – 4 ملن. توننا بولدى.
سونىمەن قاتار، قابىلدانعان شارالار مەن قولايلى اۋا-رايىنىڭ ارقاسىندا ۆەگەتاسيالىق كەزەڭدە استىقتىڭ جاقسى ونىمدىلىگى بولجانادى، بۇل اۋىسپالى قورلاردى ەسكەرە وتىرىپ، استىق نارىعىندا ارتىق ۇسىنىس جاسايدى.
وسىعان بايلانىستى، ىشكى نارىقتى قورعاۋ جانە كەرى ەكسپورتتاۋ فاكتىلەرىن بولدىرماۋ ماقساتىندا 2024 جىلعى 26 شىلدەدە سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا قازاقستان رەسپۋبليكاسىنىڭ اۋماعى ارقىلى بيدايدىڭ ءترانزيتىن، سونداي-اق ولاردىڭ قازاقستان رەسپۋبليكاسىنىڭ اۋماعى ارقىلى ەۋرازيالىق ەكونوميكالىق وداققا مۇشە ءبىر مەملەكەتتىڭ اۋماعىنان ەۋرازيالىق ەكونوميكالىق وداققا مۇشە ەكىنشى مەملەكەتتىڭ اۋماعىنا ورىن اۋىستىرۋىن قوسپاعاندا، 2024 جىلعى 31 جەلتوقسانعا دەيىن بيدايدى (سەق تن كودى: 1001) قازاقستان رەسپۋبليكاسىنىڭ اۋماعىنا كولىكتىڭ بارلىق تۇرلەرىمەن اكەلۋگە تىيىم سالۋ تۋرالى شەشىم قابىلداندى.
ۆاك شەشىمىنە سايكەس «قازاقستان رەسپۋبليكاسىنىڭ اۋماعىنا بيداي اكەلۋدىڭ كەيبىر ماسەلەلەرى تۋرالى» قازاقستان رەسپۋبليكاسى اۋىل شارۋاشىلىعى ءمينيسترىنىڭ 2024 جىلعى 19 تامىزداعى № 278 ءتيىستى بۇيرىعى بەكىتىلدى.
بۇيرىق 21 تامىزدان باستاپ قولدانىسقا ەنگىزىلەدى جانە 2024 جىلعى 31 جەلتوقسانعا دەيىن قولدانىلادى.