1414 قاۋىرت جەلىسىندە تاۋلىك بويى 38 كاسىبي پسيحولوگ جۇمىس ىستەدى.
ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياس توتەنشە جاعداي كەزىندە 1414 قاۋىرت جەلىسى ارقىلى قازاقستاندىقتارعا قولداۋ كورسەتكەن پسيحولوگ ماماندارعا العىس حات تابىستادى، دەپ حابارلايدى Almaty-akshamy.kz ق ر اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.
ەسكە سالايىق، قاڭتار ايىنىڭ باسىندا ق ر اقپارات جانە قوعامدىق دامۋ مينيسترلىگى ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن بىرلەسىپ، 1414 ءبىرىڭعاي كولل-ورتالىعى بازاسىندا جەكە تەلەفون جەلىسىن قۇرعان بولاتىن.
مۇندا ەلىمىزدىڭ كومەككە مۇقتاج تۇرعىندارىنا كاسىبي پسيحولوگيالىق كومەك كورسەتىلدى. قاۋىرت جەلى نومىرىنە حابارلاسقان بارلىق قازاقستاندىقتارمەن تاۋلىك بويى 38 كاسىبي پسيحولوگ جۇمىس ىستەدى.
«توتەنشە جاعداي جاريالانعان العاشقى كۇندەردە ءبىزدىڭ قىزمەتكەرلەر الەۋمەتتىك جەلىلەر ارقىلى قاۋىرت جەلىنىڭ جۇمىسىنا كاسىبي پسيحولوگتاردى تارتۋ قاجەتتىگىن حابارلاپ، ماماندارعا ىزدەۋ سالعان بولاتىن. ءبىزدىڭ ءوتىنىشىمىزدى جەرگە تاستاماي، ازاماتتارعا كومەك كورسەتۋگە نيەت بىلدىرگەندەر از بولعان جوق. ۆولونتەر رەتىندە جۇمىس ىستەۋگە دايىندىعىن كورسەتكەن بارلىق پسيحولوگتارعا ءبىز كومەككە جۇگىنگەن تۇرعىندارعا قولداۋ كورسەتكەنى ءۇشىن ءوز العىسىمىزدى ايتامىز»، - دەدى ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياس.
پسيحولوگيالىق قولداۋ باعىتىنداعى جۇمىس ودان ءارى جالعاساتىن بولادى. ازاماتتىق باستامالاردى قولداۋ ورتالىعى باسقارما ءتورايىمىنىڭ ايتۋىنشا، ەندى جاپپاي تارتىپسىزدىكتەردىڭ كۋاسى بولعان جانە پسيحولوگتاردىڭ كاسىبي كومەگىنە مۇقتاج بالالار مەن جاسوسپىرىمدەرگە كومەك كورسەتىلمەك.