2022 جىلى قازاقستاندىقتارعا رەسپۋبليكالىق بيۋدجەتتەن 2،9 ترلن تەڭگەدەن استام سوماعا زەينەتاقى تولەندى، ونىڭ ىشىندە بازالىق زەينەتاقىعا 883،7 ملرد تەڭگە، ىنتىماقتى زەينەتاقىعا 2 022،6 ملرد تەڭگە جۇمسالدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
2022 جىلعى جەلتوقساندا رەسپۋبليكالىق بيۋدجەتتەن زەينەتاقى تولەمدەرىنە 247،4 ملرد تەڭگە، ونىڭ ىشىندە بازالىق زەينەتاقىنى تولەۋگە 75،4 ملرد تەڭگە، ىنتىماقتى زەينەتاقىنى تولەۋگە 172 ملرد تەڭگە ءبولىندى.
2023 جىلعى 1 قاڭتارداعى جاعداي بويىنشا زەينەتكەرلەر سانى – 2 ملن 295 مىڭ ادام.
2023 جىلدىڭ 1 قاڭتارىندا جيىنتىق زەينەتاقىنىڭ ورتاشا مولشەرى 108 761 تەڭگەنى قۇرادى، ونىڭ ىشىندە ىنتىماقتى زەينەتاقى مولشەرى – 74 950 تەڭگە، بازالىق زەينەتاقى – 33 811 تەڭگە.
«2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءار الۋشىعا جەكە تاعايىندالاتىنىن ەسكە سالامىز. بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى»، - دەلىنگەن مينيسترلىك حابارلاماسىندا.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي-اق مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 60%-نا تەڭ بولسا، سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. ال ەگەر ءسىزدىڭ ءوتىلىڭىز 20 جىل بولسا، بازالىق زەينەتاقى تومەنگى كۇنكورىس دەڭگەيىنىڭ 80 %-ىن قۇرايدى. ەڭبەك ءوتىلى 30 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە ياعني 100% بەلگىلەنەدى.
ەگەر ءبىر اي ىشىندە مىندەتتى زەينەتاقى جارنالارى ءبىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا، زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.
ىنتىماقتى زەينەتاقىلاردىڭ مولشەرى جىل سايىن ينفلياسيا دەڭگەيىنەن 2% ارتىپ كوتەرىلۋگە كەپىلدىك بەرىلەدى، بۇل 2014 جىلى قابىلدانعان زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىنا سايكەس كەلەدى.
«2023-2025 جىلدارعا ارنالعان رەسپۋبليكالىق بيۋدجەت تۋرالى» زاڭعا سايكەس جاسىنا جانە ەڭبەك سىڭىرگەن جىلدارىنا بايلانىستى زەينەتاقى تولەمدەرىنىڭ مولشەرى 2023 جىلعى 1 قاڭتاردان باستاپ الىناتىن مولشەردەن 10،5% - عا ارتتى.
سونداي-اق مەملەكەت باسشىسىنىڭ تاپسىرماسىن ىسكە اسىرۋ شەڭبەرىندە ىنتىماقتى زەينەتاقىنى ەسەپتەۋ ءۇشىن ەڭ جوعارى تابىس مولشەرى 46-دان 55 اەك-كە دەيىن ۇلعايتىلدى.
مەملەكەتتىك بازالىق زەينەتاقى تولەمىنىڭ مولشەرى ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى، سونداي-اق ەڭ تومەنگى مولشەردىڭ ەڭ تومەنگى كۇنكورىس دەڭگەيىنىڭ 54% - دان 60% - عا دەيىن ۇلعايۋىنا بايلانىستى ارتتىرىلدى.
وسىلايشا، 2023 جىلعى 1 قاڭتاردان باستاپ بازالىق زەينەتاقى تولەمىن ەسكەرە وتىرىپ، زەينەتاقىلاردىڭ ەڭ تومەنگى مولشەرى 68 223 تەڭگەدەن (2022 جىلى) 77 417 تەڭگەگە دەيىن ارتتى.