قۇقىقبۇزۋشىلىقتاردىڭ 52،3%-ى ەڭبەكتى قورعاۋ ەرەجەلەرىمەن بايلانىستى.
ۇستىمىزدەگى جىلدىڭ ون ايىندا، ستاتيستيكالىق دەرەك بويىنشا، قازاقستاندا ادام قۇقىعىنا بايلانىستى 873 قىلمىستىق ءىس تىركەلگەن. بۇل وتكەن جىلعى كورسەتكىشتەرگە قاراعاندا 14،3%-عا از بولىپ وتىر.
سەبەبى بىلتىر ءدال وسى ۋاقىتتا 1000-عا جۋىق قۇقىقبۇزۋشىلىق تىركەلگەن. رەسمي مالىمەتكە سايكەس، مۇنداي قۇقىق بۇزۋشىلىقتاردىڭ سانى جىلدان جىلعا ازايىپ كەلەدى، دەپ حابارلايدى Almaty-akshamy.kz Ranking.kz سايتىنا سىلتەمە جاساپ.
وڭىرلىك بولىنىستە تۇلعانىڭ كونستيتۋسيالىق جانە وزگە دە قۇقىقتارى مەن بوستاندىقتارىن بۇزۋعا قاتىستى كوپ قىلمىستىق قۇقىقبۇزۋشىلىق الماتى جانە شىعىس قازاقستان وبلىستارىندا تىركەلدى: وڭىرلەردىڭ ءارقايسىسىندا 90 جاعدايدان، تيىسىنشە ءبىر جىل بۇرىنعىعا قاراعاندا 6،2%-عا از جانە 4،7%-عا ارتىق.
سونداي-اق، العاشقى ۇشتىكتە استانا (84 جاعداي، 26،3%-عا از)، الماتى (77 جاعداي، 13،2%-عا كوپ) جانە اقمولا وبلىسى (63 جاعداي، 19،2%-عا از) تۇر. مۇنداي قۇقىقبۇزۋشىلىقتاردىڭ ەڭ ازى قىزىلوردا وبلىسىندا تىركەلدى: ءبىر جىل بۇرىن 21، بيىل 8 جاعداي. بۇدان ءارى ۇلىتاۋ جانە جەتىسۋ وبلىستارى: ءار وڭىردە - 12 جاعدايدان.
بارلىق وسىنداي قۇقىق بۇزۋشىلىقتاردىڭ 52،3%-ى ەڭبەكتى قورعاۋ ەرەجەلەرىمەن بايلانىستى: 457 جاعداي، جىل ىشىندە 22،1%-عا ازايعان. وسى ساناتتاعى "تانىمال" قۇقىقبۇزۋشىلىقتاردىڭ اراسىندا ازاپتاۋ (197 جاعداي، ءبىر جىل بۇرىنعىدان 1،6 ەسە كوپ) جانە تۇرعىن ۇيگە قول سۇعىلماۋشىلىقتى بۇزۋ (173 جاعداي، جىل ىشىندە 33،2% ازايعان) بار.
تاعى 36 جاعداي جەكە ومىرگە قول سۇعىلماۋشىلىقتى جانە دەربەس دەرەكتەر جانە ولاردى قورعاۋ تۋرالى زاڭنامانى بۇزۋعا، 6 جاعداي ەڭبەك زاڭناماسىن بۇزۋعا، 4 جاعداي حات الماسۋ، تەلەفون ارقىلى سويلەسۋ، پوشتا، تەلەگراف نەمەسە وزگە دە حابارلامالار قۇپياسىن زاڭسىز بۇزۋ بولىپ وتىر.
بۇل رەتتە ميتينگىلەر مەن دەمونستراسيالاردى ۇيىمداستىرۋعا جانە وتكىزۋگە كەدەرگى جاساۋ، اقپاراتتىق رەسۋرستارعا قول جەتكىزۋ قۇقىعىن زاڭسىز شەكتەۋ، جۋرناليستەردىڭ زاڭدى كاسىبي قىزمەتىنە كەدەرگى جاساۋ، سايلاۋ قۇجاتتارىن بۇرمالاۋ سياقتى باپتار بويىنشا بىردە-بىر قۇقىقبۇزۋشىلىق تىركەلگەن جوق.