قازاقستاندىقتاردى ۋكراينادان ەۆاكۋاسيالاۋ شارالارى اياقتالدى

ۋكراينادان شىعا الماعان ازاماتتاردىڭ وتىنىشتەرى جەكە تارتىپتە قارالادى.

قازاقستان رەسپۋبليكاسىنىڭ ۋكرايناداعى ەلشىلىگى قازىرگى كەزدە رەپاترياسيا ۇشاقتارىمەن ازاماتتاردى ەۆاكۋاسيالاۋ اياقتالعانىن جەتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«قۇرمەتتى قازاقستان رەسپۋبليكاسىنىڭ ۋكرايناداعى ازاماتتارى، قازاقستان رەسپۋبليكاسىنىڭ ۋكرايناداعى ەلشىلىگى 2022 جىلعى 28 ناۋرىزداعى جاعداي بويىنشا كاتوۆيسە قالاسىنان (پولشا) جەتى ەۆاكۋاسيالىق رەيس ورىندالعانىن حابارلايدى. ۋكراينادان 900 قازاقستان ازاماتى ەۆاكۋاسيالانىپ، ولاردىڭ 743ء-ى قازاقستانعا ورالدى. قازىرگى كەزدە ازاماتتاردى رەپاترياسيا ۇشاقتارىمەن ەۆاكۋاسيالاۋ اياقتالدى. جابىق ەلدى مەكەندەردە قالىپ قويعان جانە كورسەتىلگەن رەيستەرمەن ۋكراينادان شىعا الماعان ازاماتتاردىڭ وتىنىشتەرى جەكە تارتىپتە قارالادى»، - دەلىنگەن ەلشىلىك حابارلاماسىندا.

ەسكە سالا كەتسەك، 28 ناۋرىزدا كاتوۆيسە قالاسىنان بورتىندا قازاقستان ازاماتتارى بار جەتىنشى رەپاترياسيالىق رەيس ۇشتى. سونداي-اق، ق ر توتەنشە جاعدايلار مينيسترلىگى الماتىدان پولشانىڭ كاتوۆيسە قالاسىنا ۋكراينا ازاماتتارى ءۇشىن گۋمانيتارلىق كومەكتىڭ كەزەكتى پارتياسى سالىنعان ارنايى رەيس ۇيىمداستىردى.