قازاقستاندىقتار قانت پەن ءتاتتى ونىمدەردى تۇتىنۋدان قايتپاي تۇر

2024 جىلدىڭ ءتورتىنشى توقسانىنىڭ قورىتىندىسى بويىنشا قازاقستاندىقتار ورتا ەسەپپەن ءار ادامعا شاققاندا 10،8 كگ ءتاتتى ءونىم تۇتىنعان.

 بۇل كورسەتكىش 2023 جىلدىڭ سايكەس كەزەڭىمەن سالىستىرعاندا ايتارلىقتاي وزگەرمەگەن – جىلدىق ءوسىم نەبارى 0،4%-دى قۇرادى.

تۇتىنىلعان ءتاتتى ونىمدەردىڭ ەڭ ۇلكەن بولىگىن قانت قۇرادى: ءبىر ادامعا توقسانىنا ورتا ەسەپپەن 4،4 كگ. بۇل وتكەن جىلعى 4،6 كگ كورسەتكىشپەن سالىستىرعاندا 4%-عا ازايعانىن كورسەتەدى.

قازاقستاندىقتار ەڭ كوپ تۇتىناتىن تاتتىلەر قاتارىنا گلازۋرمەن قاپتالعان شوكولاد كونفەتتەرى (675 گ)، توساپ، دجەم جانە پوۆيدلو (497 گ)، بال (448 گ)، مۇزداتىلعان ءتاتتى ونىمدەر (312 گ)، شوكولاد (245 گ) جانە رافيناد قانت (80 گ) جاتادى.

اۋىل تۇرعىندارى قالا حالقىنا قاراعاندا ءسال كوبىرەك ءتاتتى تۇتىنعان: ورتاشا ەسەپپەن ءار ادامعا 10،9 كگ، ال قالالىقتاردا بۇل كورسەتكىش 10،7 كگ.

ايماقتار بويىنشا ەڭ جوعارى تۇتىنۋ دەڭگەيى ۇلىتاۋ وبلىسىندا تىركەلگەن – ءار ادامعا شاققاندا 15،7 كگ، بۇل ءبىر جىلدا 8،9%-عا ارتقان. ودان كەيىن قاراعاندى جانە جەتىسۋ وبلىستارى كەلەدى – ءارقايسىسىندا 12،8 كگ. ەڭ تومەنگى كورسەتكىش اتىراۋ وبلىسىندا بايقالعان – تۇرعىندار ورتا ەسەپپەن 8،5 كگ ءتاتتى ءونىم تۇتىنعان.