وتەماقى 2023 جىلدىڭ 23 اقپانىنان كەيىنگى سالىنعان اقشاعا تولەنەدى.
قازاقستاننىڭ دەپوزيتتەرگە كەپىلدىك بەرۋ قورىنىڭ ءتوراعاسى ءادىل وتەمبايەۆ 10%-تىك وتەماقىعا ءوتىنىش بەرىپ جاتقان ازاماتتار سانى از ەكەنىن مالىمدەدى، دەپ حابارلايدى Almaty-akshamy.kz
«ءقازىر ءبىز تولەم الۋعا ءوتىنىش بەرۋ بەلسەندىلىگىنىڭ تومەن ەكەنىن بايقاپ وتىرمىز. 11 قاراشاداعى جاعداي بويىنشا 1،8 ملن ادام ءوتىنىش بەردى، بۇل وتەماقى الۋعا ۇمىتكەرلەردىڭ جالپى سانىنىڭ 35%-ىنەن از»، - دەدى وتەمبايەۆ الماتىدا ءوتىپ جاتقان «قازاقستان قارجىگەرلەرىنىڭ ح كونگرەسى» اياسىندا.
ول قازاقستاندىق بانكتەردە وسى جىلدىڭ 23 اقپانىنا دەيىن اشىلعان تەڭگەدەگى دەپوزيتى بار ازاماتتار مەملەكەتتەن 10% كولەمىندە وتەماقى الۋعا قۇقىلى ەكەنىن ەسكە سالدى.
ول ءۇشىن دەپوزيت اشىلعان بانككە ءوتىنىش بەرىپ، سول ارقىلى تولەم الۋعا كەلىسىمىڭىزدى راستاۋ قاجەت. ءوتىنىش 2023 جىلدىڭ 1 قاڭتارىنا دەيىن قابىلدانادى.
وسى ورايدا وتەمبايەۆ سالىمشىلاردى وتەماقى الۋ قۇقىعىن بەلسەندى پايدالانۋعا شاقىردى.
«سالىمشىلاردىڭ ءبىر جارىم اي ۋاقىتى بار، ءبىراق بانككە ءوتىنىش بەرۋدى جىل سوڭىنا دەيىن قالدىرماۋدى وتىنەمىن. ونىڭ ۇستىنە بۇل قيىن ەمەس، كوپتەگەن قازاقستاندىق بانكتە ءوتىنىشتى ونلاين بەرۋگە بولادى. بانكتىڭ ءموبيلدى قوسىمشاسى بولسا جەتكىلىكتى»، - دەيدى قور باسشىسى.
ايتا كەتەرى، وتەماقى 2023 جىلدىڭ 23 اقپانىنان كەيىن تولەنەدى.