قازاقستاندىقتار اۆتوبۋس بيلەتتەرىن ءموبيلدى قوسىمشالار ارقىلى الا الادى

سەرۆيستى ىسكە قوسۋ جونىندە جۇمىستار جۇرگىزىلدى.

قازاقستاندىقتار ەندى ءموبيلدى قوسىمشالار ارقىلى اۆتوبۋس بيلەتىن الا بەرەتىن بولدى، دەپ حابارلايدى Almaty-akshamy.kz.

«ازاماتتارعا قولايلى جاعداي جاساۋ ماقساتىندا ق ر يندۋستريا جانە ينفراقۇرىلىمدىق دامۋ مينيسترلىگى نۇر-سۇلتان قالاسىنداعى اۆتوۆوكزال جانە Halyk Bank-پەن بىرلەسىپ، جول ءجۇرۋ بيلەتتەرىن Halyk Homebank ءموبيلدى قوسىمشاسى ارقىلى ساتىپ الۋ سەرۆيسىن ىسكە قوسۋ جونىندە جۇمىستار جۇرگىزدى»، - دەلىنگەن مينيسترلىكتىڭ باسپا ءسوز قىزمەتى تاراتقان حابارلامادا. 

اتاپ ايتقاندا، وسى باستاما ارقىلى Halyk Travel قوسىمشاسىنىڭ «اۆتوبۋستار» ەلەكتروندى سەرۆيسى ازاماتتار ءۇشىن قولجەتىمدى بولدى. اتالعان سەرۆيس جول ءجۇرۋ بيلەتتەرىن الدىن-الا برونداۋ جانە ساتىپ الۋ كەزىندەگى ۋاقىتتى ايتارلىقتاي ۇنەمدەيدى. سەرۆيستى جاساۋشىلار الداعى ۋاقىتتا جولاۋشىلاردىڭ وزدەرى مەن جۇكتەرىن جاعىمسىز جايتتار مەن وقىس وقيعالاردان ساقتاندىرۋدى دا ەنگىزۋدى كوزدەپ وتىر.

قازىرگى تاڭدا اتالعان ءموبيلدى قوسىمشا ارقىلى وتانداستارىمىز نۇر-سۇلتاننان دەرجاۆينسك، كونستانتينوۆكا، ناۋموۆكا، ستەپنوگورسك، قىزىلوردا، تاراز، قاراعاندى، الماتى، شىمكەنت، وسكەمەن قالالارى مەن مونعوليا جانە وزبەكستان سىندى كورشىلەس ەلدەرگە دە جول ءجۇرۋ قۇجاتتارىن ساتىپ الۋدا.

ايتا كەتەرلىگى، الداعى ۋاقىتتا اتالعان جوبانىڭ شەڭبەرىن ۇلعايتىپ، بارلىق قالاارالىق جانە حالىقارالىق باعىتتارداعى مارشرۋتتاردى اشۋ جوسپارلانۋدا.