بۇل شارا ەموسيونالدى سترەسس دەڭگەيىن تومەندەتەدى.
ۇستىمىزدەگى جىلعى مەكتەپ تۇلەكتەرىنە ۇلتتىق ءبىرىڭعاي تەستىلەۋدى ەكى رەت تاپسىرۋعا رۇقسات بەرىلەدى. بۇل تۋرالى ولارعا ارنايى حات جازعان ءبىلىم جانە عىلىم ءمينيسترى اسحات ايماعامبەتوۆ جەتكىزدى، دەپ حابارلايدى Almaty-akshamy.kz.
مينيستر الەۋمەتتىك جەلىلەردە جىل سايىنعى ءداستۇر بويىنشا تۇلەكتەرگە حات جازعانىن جەتكىزدى. بۇل قۇجاتتا مينيستر تۇلەكتەرگە ساتتىلىك تىلەپ، وقۋشىلاردىڭ ۇبت-دان قيىندىقسىز ءوتۋى ءۇشىن قوسىمشا قانداي شارالار قابىلدانعانىن جازعان.
«جاقسى جاڭالىق تا بار. Instagram-دا مەنى بەلگىلەپ، گرانتقا ءتۇسۋ ءۇشىن ءبىر ەمەس، ەكى رەت ۇبت تاپسىرۋ تۋرالى ءوتىنىش جازىپ جۇرگەندەرىڭىزدى بىلەمىن. شەشىم قابىلداۋ كەزىندە ءبىز وقۋشىلاردىڭ ۇسىنىسىن، قىزىعۋشىلىعىن نازاردان شىعارماۋعا تىرىسامىز. سول سەبەپتى وسى جولى دا سىزدەردىڭ ۇسىنىستارىڭىز بويىنشا شەشىم قابىلدادىق. ياعني ەندى سىزدەر ەكى رەت ۇبت تاپسىرىپ، گرانتقا تۇسۋگە مۇمكىندىك الاسىزدار. بۇل شارا ەموسيونالدى سترەسس دەڭگەيىن تومەندەتەتىنىنە سەنىمىمىز مول»، - دەپ جازدى مينيستر Facebook پاراقشاسىندا.
سونىمەن قاتار ول تۇلەكتەرگە ۇلتتىق ءبىرىڭعاي تەستىلەۋ سىناعىنان سۇرىنبەي وتۋلەرىنە تىلەكتەس ەكەنىن جەتكىزدى.
«بىلىمدەرىڭىزدىڭ ارقاسىندا جوعارى ناتيجەگە قول جەتكىزىپ، گرانتقا يە بولىڭىزدار! بارشاڭىزعا ساتتىلىك تىلەيمىن!» - دەدى اسحات ايماعامبەتوۆ.