قازاقستان ۇلتتىق قۇراماسى تەننيستەن ديەۆيس كۋبوگىنىڭ پلەي-وفف كەزەڭىنە دايىندىقتى باستادى، دەپ حابارلايدى Almaty-akshamy.kz.
قازاقستان تەننيس فەدەراسياسىنان ءمالىم ەتكەندەي، قازاقستاندىقتار 16-17 قىركۇيەكتە سوفيادا ۇلتتىق تەننيس ورتالىعىنىڭ توپىراق توسەنىشىندە بولگاريامەن پلەي-وفف ماچىن وتكىزەدى.
كوماندا كاپيتانى يۋريي ششۋكيننىڭ باستاۋىمەن الەكساندر بۋبليك، تيموفەي سكاتوۆ، ميحايل كۋكۋشكين، اندرەي گولۋبيەۆ جانە الەكساندر نەدوۆەسوۆ ءقازىر جاتتىعۋ ۇستىندە.
بۇل قوس قۇراما اراسىنداعى العاشقى كەزدەسۋ بولماق. وسىعان دەيىن بولگاريا كومانداسى ديەۆيس كۋبوگىنىڭ فينالدىق كەزەڭىنە ەشقاشان شىعىپ كورمەگەن.
«بولگاريا قۇراماسىنىڭ كوشباسشىسى گريگور ديميتروۆتىڭ قاتىساتىنى جونىندە ناقتى اقپارات جوق. ازىرگە ول تىزىمدە جوق، ءبىراق 15 قىركۇيەك كۇنگى جەرەبەگە دەيىن قۇرامعا ەنگىزىلۋى مۇمكىن. ديەۆيس كۋبوگى – كوماندالىق جارىس. مۇندا رەيتينگ ونشا ءرول اتقارمايدى. ديميتروۆسىز دا بولگاريادا جاقسى تەننيسشىلەر بار، ونىڭ ۇستىنە ولار ءوز جانكۇيەرلەرىنىڭ كوز الدىندا وينايدى. سوندىقتان وڭايعا تۇسپەيدى. دەگەنمەن كوماندالىق الەم چەمپيوناتىنىڭ ىرىكتەۋ كەزەڭىنە شىعۋ ءۇشىن بىزگە قالايدا جەڭىس كەرەك»، - دەدى قازاقستاننىڭ ەكىنشى راكەتكاسى تيموفەي سكاتوۆ.
16 قىركۇيەك كۇنى جەكەلەي سىندا ەكى باسەكە وتەدى. 17 قىركۇيەكتە ءبىر جۇپتىق، تاعى ەكى جەكەلەي كەزدەسۋ وينالادى. ماچ جەڭىمپازى الداعى جىلدىڭ اقپانىندا ديەۆيس كۋبوگىنىڭ فينالدىق كەزەڭىنە جولداما الۋ ءۇشىن سىنعا تۇسەدى.