قازاقستاندىق، الەمنىڭ 250-راكەتكاسى تيموفەي سكاتوۆ سيەۆيليا (يسپانيا) چەللەندجەر ءتۋرنيرىنىڭ شيرەك فينالىنا ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق سپورتشى ەكىنشى اينالىمدا دۇنيەجۇزىلىك رەيتينگتە 408-ورىندا تۇرعان يسپانيالىق حاۆەر كوسانو باررانكومەن شەبەرلىك بايقاستى.
ءبىرىنشى پارتيادا ت.سكاتوۆ ايقىن باسىمدىلىق تانىتتى – 6:2.
ەكىنشى سەتتە دە تيموفەي 2:0 ەسەبىمەن العا كەتتى. ەسەپ 3:2 بولعان مەزەتتە قارسىلاسى ماچتى جالعاستىرۋدان باس تارتتى.
ساعات جارىمعا جۋىق ۋاقىتقا سوزىلعان باسەكە بارىسىندا ت.سكاتوۆ ەيس جاساماعانىمەن، 12 برەيك-پوينتتىڭ تورتەۋىن پايدالاندى. باررانكو 1 ەيس، 1 برەيكپەن (5 برەيك-پوينت) شەكتەلدى.
تيموفەي سكاتوۆ جارتىلاي فينالعا شىعۋ ءۇشىن الەمنىڭ 116-ىنشى، جارىستىڭ 4-راكەتكاسى، يسپانيالىق كارلوس تابەرنەر نەمەسە رەيتينگتە 971-ساتىداعى پولشا وكىلى ەجي ءيانوۆيچتىڭ بىرەۋىمەن تالاسادى.
ەسكە سالا كەتەيىك، بۇدان بۇرىن قازاقستاندىق تەننيسشىنىڭ تايلاندتاعى جارىستىڭ شيرەك فينالىنا شىققانىن جازعان بولاتىنبىز.