قازاقستاندىق تاربيەشىلەردىڭ جالاقىسى وسەتىن بولدى

سونىمەن قاتار مۇعالىمدەر الاتىن جالاقىعا قوسىمشا تولەمدەر بەلگىلەنەدى.

قازاقستان ۇكىمەتى جاڭا جىلدان باستاپ بالاباقشا تاربيەشىلەردىڭ، مۇعالىمدەردىڭ جالاقىسىن وسىرەدى، دەپ حابارلايدى Almaty-akshamy.kz. 

«2023 جىلعى 1 قاڭتاردان باستاپ پرەزيدەنت قاسىم-جومارت توقايەۆتىڭ تاپسىرماسى بويىنشا بالاباقشا تاربيەشىلەرىنىڭ، مەكتەپتەر مەن كوللەدجدەر مۇعالىمدەرىنىڭ، سونداي-اق قوسىمشا ءبىلىم بەرۋ جۇيەسى ماماندارىنىڭ جالاقىسى تاعى 25%-عا وسەدى»،- دەلىنگەن وقۋ-اعارتۋ مينيسترلىگىنىڭ باسپا ءسوز قىزمەتىنىڭ حابارلاماسىندا.

مەملەكەت باسشىسىنىڭ تاپسىرماسى بويىنشا مۇعالىمدەردىڭ جالاقىسى 2020 جىلعى قاڭتاردان باستاپ جىل سايىن 25%-عا ارتىپ، 2022 جىلعى قاڭتاردا تاعى 25%-عا وسكەن بولاتىن. وسىلايشا مۇعالىمدەردىڭ جالاقىسى ەكى ەسە ءوستى. 

«پرەزيدەنت قاسىم-جومارت توقايەۆتىڭ قولداۋىنىڭ ارقاسىندا مۇعالىمدەر جالاقىسىنىڭ جىل سايىن كوتەرىلۋى وڭ ناتيجە بەرىپ وتىر. ءمۇعالىم ماماندىعىنا مەكتەپتى ۇزدىك بىتىرگەن تۇلەكتەر كەلە باستادى. تالاپكەرلەردىڭ ۇبت-داعى ورتاشا بالى ايتارلىقتاي ءوسىپ، پەداگوگيكالىق ماماندىقتارعا تۇسەتىن «التىن بەلگى» يەگەرلەرىنىڭ سانى بىرنەشە ەسە كوبەيدى. 2023 جىلعى قاڭتاردان باستاپ مۇعالىمدەردىڭ جالاقىسى تاعى 25%-عا وسەدى. سونىمەن قاتار مۇعالىمدەر الاتىن جالاقىعا قوسىمشا تولەمدەر بەلگىلەنەدى. بۇل – بىلىكتىلىك ساناتى ءۇشىن (لاۋازىمدىق جالاقىنىڭ 30%-دان 50%-عا دەيىن)، ماگيستر دارەجەسى ءۇشىن، ساباقتاردى اعىلشىن تىلىندە جۇرگىزگەنى، داپتەرلەردى تەكسەرگەنى، سىنىپ جەتەكشىلىگى جانە تالىمگەرلىگى ءۇشىن قوسىمشا تولەمدەر»، – دەپ ءتۇسىندىردى ق ر وقۋ-اعارتۋ مينيسترلىگىنىڭ قارجى جانە بيۋدجەتتى جوسپارلاۋ دەپارتامەنتىنىڭ ديرەكتورى عالىمجان مولداش. 

مۇعالىمدەردىڭ جالاقىسى وقۋ جۇكتەمەسىنە، ءبىلىم دەڭگەيىنە، بىلىكتىلىگىنە، جۇمىس وتىلىنە، ماگيستر دارەجەسىنە جانە باسقا دا قوسىمشا تولەمدەرگە بايلانىستى ەسەپتەلەتىنىن ايتا كەتەيىك. دەنە شىنىقتىرۋ مۇعالىمدەرىنە ساباقتان كەيىن قوسىمشا سپورت سەكسيالارىن وتكىزگەنى ءۇشىن اي سايىن قوسىمشا اقى تولەنەتىنىن دە ەستەرىڭىزگە سالامىز.