قازاقستاندىق سۋرەتشىنىڭ كارتينالارىنا پاندەميا تاقىرىبى ارقاۋ بولعان

قازاقستان سۋرەتشىلەر وداعىنىڭ مۇشەسى جەڭىس نۇرلىبايەۆ - پاندەميا تاقىرىبىندا سالىنعان 300 كارتينانىڭ اۆتورى.

ەلوردادا «پاندەميا. شەكتەۋ. سامعاۋ...» تاقىرىبىندا قازاقستاندىق تانىمال سۋرەتشى جەڭىس نۇرلىبايەۆتىڭ كورمەسى ءوتتى، دەپ حابارلايدى Almaty-akshamy.kz№

ونەرسۇيەر قاۋىمنىڭ نازارىنا وقشاۋلاۋ كەزىندە سالىنعان تۋىندىلارى ۇسىنىلدى. سۋرەتشى ادامنىڭ ەموسيونالدى-پسيحولوگيالىق جاعدايىن توردان شىعىپ، قاناتىن كەڭىنەن جايىپ ۇشىپ باراتىن قۇس رەتىندە كورسەتتى. شەبەر سوڭعى جارتى جىلدا 300-گە جۋىق كارتينا سالعان، الايدا كورمەدە ونىڭ تەك 60-ى عانا تانىستىرىلدى. اۆتور ءوز شىعارمالارىن ءارتۇرلى ادىستەرمەن سالعان. ونىڭ ىشىندە اكۆارەل، اكريل، شارلى قالام، كومپيۋتەرلىك گرافيكانى پايدالانعان.

ايتا كەتەيىك، جەڭىس نۇرلىبايەۆ – قازاقستان سۋرەتشىلەر وداعىنىڭ مۇشەسى، پرەزيدەنت سىيلىعىنىڭ لاۋرەاتى، سونداي-اق وتاندىق جانە الەمدىك سۋرەتشىلەر تۋرالى «اق زەر» كىتابىنىڭ اۆتورى.

«ۇيدە قامالىپ وتىرعان كەزدە مىنا توردىڭ ىشىندە وتىرعان بەينەسى بار كارتينا دۇنيەگە كەلدى. شىعا المايمىز نە كىرە المايمىز دەگەندەي... ەسىك، تەرەزە اشىق بولسا دا، شىعا المايمىز. ونەر يەسىن قانشا جەردەن شەكتەسە دە، ونىڭ ىشىندەگى شىعارماشىلىق ءۇردىستىڭ توقتاماي ءجۇرىپ جاتاتىندىعىن، ۇشاتىندىعىن جەتكىزگىم كەلدى. ەگەر سۇرانىس بولاتىن بولسا، باسقا گالەرەيالاردا دا كورسەتۋ، شەتەلگە شىعارۋ ويدا بار»، - دەيدى سۋرەتشى جەڭىس نۇرلىبايەۆ